Այս փոփոխությունները մեծ նշանակություն ունեն դրամավարկային քաղաքականության կարգավորման տեսանկյունից: Այս մասին դեկտեմբերի 12-ին Ազգային ժողովի արտահերթ նիստին «ՀՀ բյուջետային համակարգի մասին» եւ «Պետական պարտքի մասին» օրենքներում փոփոխություններ եւ լրացումներ կատարելու մասին օրինագծի քննարկման ժամանակ հայտարարեց ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ, «Ծառուկյան» դաշինքի պատգամավոր Վարդան Բոստանջյանը:
Պատգամավորը նշեց, որ սա կարեւոր է նաև պետական բյուջեի կառուցվածքի առումով: «Մենք դժվարին իրավիճակում ենք հայտնվել այս 60 տոկոսանոց պարտքի պատճառով: Ամեն դեպքում, ֆորս-մաժորային իրավիճակներ մեր նման երկրում կարող են առաջանալ», - նշեց Բոստանջյանը՝ հավելելով, որ այն չի առաջարկում մեծացնել պետական պարտքի արդեն գոյություն ունեցող չափը, այլ առաջարկում է առավել արդյունավետ օգտագործել նախկինում տրված վարկերը: