Լիալունի ժամանակ մոտոցիկլիստների մասնակցությամբ ավելի շատ մահացու վթարներ են տեղի ունենում, պարզել են գիտնականները, գրում է The BMJ ամսագիրը: Հետազոտողները վերլուծել են մահացու ելքով ավտովթարները ԱՄ-ում, Մեծ Բրիտանիայում, Կանադայում եւ Ավստրալիայում: Նրանք դիտարկել են ավելի քան 13 հազար վթար, որոնք տեղի են ունեցել ԱՄՆ-ում 1975-ից մինչեւ 2014 թվականներին՝ 1482 գիշերվա ընթացքում: Դրանցից 494 գիշերներին լիալուսին է եղել:
Նրանց հաշվարկներով՝ լիալուսնի ժամանակ տեղի է ունեցել 4494 վթար: Այլ խոսքով՝ յուրաքանչյուր լիալուսնի գիշերվան բաժին է ընկել 9,1 վթար, իսկ ցանկացած այլ գիշերվան՝ 8,64:
Այլ գիշերների հետ համեմատած՝ լիալուսնի յուրաքանչյուր 2 գիշերվան մեկ հավելյալ վթար է բաժին ընկել: Այլ երկրներում ավտովթարների վերլուծությունը նմանատիպ արդյունքներ է գրանցել: Այդպիսի վթարների տիպիկ զոհ է եղել 32 տարեկան տղամարդը, որը փոխադրամիջոցը վարել է գյուղական տեղանքով՝ առանց սաղավարտի, եւ զոհվել ճակատով բախվելու հետեւանքով:
Հետազոտողները ենթադրում են, որ երկնքում լիալուսինը ճանապարհից շեղել է նրանց ուշադրությունը, ինչն էլ վթարի է հանգեցրել: Նրանք հուսով են, որ իրենց աշխատանքի արդյունքը մոտոցիկլավարներին կստիպի ավելի ուշադիր վարել: