Երեւանի Շենգավիթ վարչական շրջանի ընդհանուր իրավասության դատարանում այսօր՝ դեկտեմբերի 12-ին, «Սասնա ծռեր» խմբի գործով առանձնացված 2-րդ մասով նիստին ամբաստանյալներից Մարտիրոս Հակոբյանը «Դեդը» իր մեղադրանքի եզրափակիչ մասի հրապարակումից հետո հայտարարությամբ հանդես եկավ: Նա նշեց, որ «Սասնա ծռեր» խմբի անդամները, գրավելով ոստիկանության ՊՊԾ գունդը, ազատագրել են այն եւ դրա տարածքում 4-րդ հանրապետություն ստեղծել, որը մտադիր են վերականգնել:
«Համոզված եմ, որ բռնությունները կանխվում են բռնությամբ: Գրավելով ՊՊԾ գունդը՝ մենք ազատագրել ենք այն եւ դրա տարածքում 4-րդ հանրապետություն ենք ստեղծել, որը մտադիր ենք վերականգնել»:
Նա նշեց, որ ծնվել է անարդարությունների դեմ պայքարելու եւ հաղթելու համար. «Լավ է լինել ոչխարի գլուխ, քան առյուծի պոչ եւ ծառայել իշխանություններին: Ես ծնվել եմ կռվելու եւ հաղթելու համար: Նաեւ նրա համար, որ նահատակվեմ ինչպես Մարտիրոս»,-ասաց Մարտիրոս Հակոբյանը:
Ամբաստանյալներից Սերգեյ Կյուրեղյանն էլ իրեն առաջադրված մեղադրանքի վերաբերյալ հայտարարութմաբ հանդես եկավ եւ նշեց, որ որպես հայ՝ ինքը պարտավորություն է ունեցել ապստամբելու, իր խոսքով, երկիրը զավթած բռնապետության դեմ. «Հայն այստեղ ճնշված է եւ դժբախտ: Իսկ երբ լքում է երկիրը, ավելի ազատ է ապրում, թեկուզ եւ Հայաստանից ավելի աղքատ երկրում»:
Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում գտնվող այս գործով արտագնա նիստը նախագահում է դատավոր Արթուր Օհանյանը:
Այս գործով կա 11 ամբաստանյալ՝ Արամ Մանուկյան, Հովհաննես Հարությունյան, Թաթուլ Թամրազյան, Արամ Հակոբյան, Տիգրան Մանուկյան, Արայիկ Հակոբյան, Վարդան Գերավետյան, Մարտիրոս Հակոբյան, Սերգեյ Կյուրեղյան, Գեւորգ Իրիցյան, Թորոս Թորոսյան:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով մյուս գործը Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը:
