ԱՄՆ նախագահ Դոնալդ Թրամփի հայտարարությունը Երուսաղեմը որպես Իսրայելի մայրաքաղաք ճանաչելու մասին մեծ նվեր էր: Քանի որ 3 հազար տարի հրեաները երազում էին ճանաչման մասին, եւ իրենք՝ հրեաները, Երուսաղեմը համարում են իրենց մայրաքաղաքը: Այս մասին NEWS.am-ի թղթակցի հետ զրույցում ասել է Հայաստանի հրեական համայնքի ղեկավար Ռիմա Վարժապետյանը:
«Բոլոր պետական հաստատությունները, այդ թվում Կնեսեթը, Երուսաղեմում են: Ամեն դեպքում, այն շատ կրոնների քաղաք է: Սա քաղաք է ողջ աշխարհի համար: Թրամփը արձանագրել է իրականությունը: Երուսաղեմը Իսրայելի մայրաքաղաքն է: Բայց շատերին դա դուր չի գալիս: Եվ ասում են, որ դա սխալ է: Նախեւառաջ Եվրոպա», - ասել է համայնքի ղեկավարը` հավելելով, որ չնայած դրան, անհրաժեշտ է շարունակել աշխատել, ապրել, ապացուցել, որ հրեաները իրավունք ունեն գոյություն ունենալ, գոյության իրավունք ունի հենց Իսրայելը:
Մեկնաբանելով այն հարցը, որ շատերը հակված են Թրափմի որոշումը սադրիչ համարել, եւ այն կարող է ավելի խորացնել իրավիճակը, համայնքի ղեկավարը նշել է, որ հայտարարությունը, ըստ էության, սրել է իրավիճակը: «Բայց աշխարհը պետք է հասկանա, որ վաղ թե ուշ այն պետք է տեղի ունենար: Ոչ ոք չի խոսում այն մասին, որ պաղեստինցիները, արաբները, բնակության իրավունք չունեն: Նրանք վայելում են քաղաքակիրթ Իսրայելի բոլոր օգուտները՝ անվճար բժշկություն, կրթվում են, աշխատում, լավ կյանք ունենալու իրավունք ունեն:
Միեւնույն ժամանակ, նրանք Իսրայելի մեծ թշնամիներն են», - հիշեցրել է Ռիմա Վարժապետյանը: Նա նշել է, որ ինթիֆադան մոտ է, ինչպես արդեն հայտարարվել է, եւ սա շատ վտանգավոր է:
«Անհրաժեշտ էր աշխարհին նախապատրաստել, անհրաժեշտ էր հիմք պատրաստել Իսրայելին հարձակումներից պաշտպանելու խնդրի լուծման համար: Եվ ո՞վ կարող էր դա անել, եթե ոչ Ամերիկան: Եվ ո՞չ անձամբ Թրամփը: Սա փաստ է: Բայց միեւնույն ժամանակ մենք այժմ Հանուկի տոնի նախաշեմին ենք: Դա հրաշք է: Եվ հրաշքներից մեկը տեղի ունեցավ տոնի նախօրեին»: