Տուլայում 2015թ. նոյեմբերին հայկական ավտոբուսի վթարի գործով դեկտեմբերի 8-ին նշանակված դատական նիստը չի կայացել:

NEWS.am-ի հետ զրույցում գործով ամբաստանյալ, 4.5 տարվա ազատազրկման դատապարտված Գառնիկ Հարությունյանի պաշտպաններից Ռուբեն Կիրակոսյանը հայտնեց, որ նիստը հետաձգվել է, քանի որ թարգմանիչը չէր ներկայացել:

«Մենք մտավախություն ունենք, որ գործի քննությունը միտումնավոր ձգձգում են, թե ինչ նպատակով, դեռեւս չենք հասկանում: Հիմա հաջորդ նիստը նշանակված է դեկտեմբերի 28-ին»,- ասաց պաշտպանը:

Նշենք, որ Վճռաբեկը հետ էր ուղարկել գործը առաջին ատյան՝ նոր դատավճիռ կայացնելու համար:

Գառնիկ Հարությունյանի դեմ քաղաքացիական հայց չկա, բողոք չունեն նաեւ վթարի հետեւանքով մահացած ուղեւորների հարազատներն ու վնասվածքներ ստացած ուղեւորները: Դեռեւս հայտնի չէ, թե դատավճիռն ուժի մեջ մտնելուց հետո որտեղ Գառնիկ Հարությունյանը կկրի պատիժը: Չի բացառվում, որ նա կտեղափոխվի Հայաստան՝ պատժի մնացած մասը կրելու համար:

Հիշեցնենք, որ վթարը Տուլայի մարզի Մ-4 մայրուղում տեղի է ունեցել 2015թ. նոյեմբերի 3-ին: Ավտոբուսում կար ավելի քան 60 մարդ, բոլորը Հայաստանի քաղաքացիներ: Վթարի հետեւանքով զոհվել է 9 մարդ, տուժել՝ 46-ը, որոնցից 32-ը հոսպիտալացվել է: Վարորդի դեմ քրեական գործ էր հարուցվել «ճանապարհային երթեւեկության կանոնները խախտելը, որն անզգուշաբար հանգեցրել է երկու եւ ավելի մարդկանց մահվան» հոդվածով: Առաջին ատյանի որոշմամբ նա դատապարտվել էր 4.5 տարվա ազատազրկման: Վերաքննիչն անփոփոխ էր թողել դատավճիռը: