Դեկտեմբերի 11-ին Արցախում զինծառայող է սպանվել: 1996 թվականին ծնված Նարեկ Ադիբեկյանի ուղղությամբ կրակել է ծառայակիցը: Քրեական գործ է հարուցվել, ծառայակցին սպանելու կասկածանքով պարտադիր ժամկետային զինծառայողը ձերբակալվել է: Սպանված Նարեկ Ադիբեկյանը Ռուսաստանի Պյատիգորսկ քաղաքից էր: Նա զինծառայություն էր անցել նաեւ Ռուսաստանում, վերադարձել Հայաստան եւ բանակ զորակոչվել: Ընկերները պատմում են, որ Նարեկը Հայաստան էր եկել՝ սովորելու, ԵՊՀ Տնտեսագիտության եւ կառավարման ֆակուլտետի ուսանող էր:
Իսկ Հայաստանի սահմանի հյուսիս-արեւելյան հատվածում զինվոր է վիրավորվել: 19-ամյա շարքային Արթուր Դանիելյանը վիրավորվել է մարտական հերթապահության ժամանակ, ականի պայթյունի հետեւանքով: Զինծառայողը Բերդի հոսպիտալում է, վիճակը կայուն ծանր է:
Կառավարության նախաձեռնությամբ Ազգային ժողովում այսօր արտահերթ նիստ էր գումարվել: Պատգամավորները քննարկել են Հարկային օրենսգրքում եւ Շահութահարկի մասին օրենքում փոփոխությունների նախագծերը, ինչպես նաեւ վարկային մեկ համաձայնագիր: Կառավարությունը մտադիր է Ասիական զարգացման բանկից 40 մլն դոլար վերցնել. բյուջետային տարին լինելու է դեֆիցիտով, այս վարկով էլ փակելու են եկամուտների եւ ծախսերի տարբերությունը:
Մի շարք պատգամավորներ դժգոհել են օրենքների հանդեպ կառավարության վերաբերմունքից: Էդմոն Մարուքյանը հռետորական հարց է հնչեցրել. ո՞նց է լինում, որ գործադիրը միայն տարվա վերջին օրերին է հիշում կարեւոր նախագծերը խորհրդարան բերելու մասին: Արամ Սարգսյանն էլ կատակել է. նույնիսկ Խոսրով Հարությունյանը հաճույք չի ստանում քննարկումներից:
Այսօր Ազգային ժողով էր եկել նաեւ Սեյրան Սարոյանը: Հանրապետական խմբակցության պատգամավորը բացակայում էր երկրից, գնացել էր բուժման: Լրագրողները Սարոյանին նույնպես հարցրել են թանկացումների մասին:
Իրանում հզոր երկրաշարժ է տեղի ունեցել: Քերման նահանգում 6.2 մագնիտուդով երկրաշարժի հետեւանքով, տարբեր տվյալներով, մեկ մարդ է զոհվել, հաղորդվում է 17 տուժածի մասին: Ավերածությունների մասին հստակ տեղեկություններ դեռեւս չկան: Հիշեցնենք, որ մեկ ամիս առաջ էլ՝ նոյեմբերի 12-ին Իրանի եւ Իրաքի սահմանին տեղի ունեցած 7.3 մագնիտուդով երկրաշարժի հետեւանքով 620 մարդ էր զոհվել:
Ռուսական զորքերը դուրս կբերվեն Սիրիայի տարածքից. Ռուսաստանի նախագահ Վլադիմիր Պուտինն է կարգադրել: Զորքերի դուրսբերման ամբողջական գործընթացը նախատեսում են ավարտել մեկ ամսվա ընթացքում: Դա, սակայն, չի նշանակում, որ Սիրիայում Ռուսաստանն այլեւս ռազմական ներկայություն չի ունենա: Ռուսական զորքերը Սիրիա էին մտել 2015 թվականի սեպտեմբերին, երկրի նախագահ Բաշար Ասադի խնդրանքով: Ռուսական աղբյուրների փոխանցմամբ՝ ավելի քան երկու տարվա ընթացքում Ռուսաստանի զինուժին հաջողվել է 1.000 բնակավայր ազատագրել 67 հազար քառակուսի կիլոմետր տարածքում, հակառակորդի զինտեխնիկա եւ ահաբեկիչների ոչնչացնել: Բայց այս ընթացքում կորուստներ է ունեցել նաեւ ռուսական կողմը՝ 39 մարդ:
Սիրիայում ռուսական ռազմակայանները կշարունակեն գործել, իսկ եթե ահաբեկիչները նորից գլուխ բարձրացնեն, Մոսկվայի հավաստմամբ, արժանի պատասխան կստանան: Անսպասելի այցով Սիրիա մեկնած եւ «Հմեյմիմ» ավիաբազայում Բաշար Ասադի հետ հանդիպած Վլադիմիր Պուտինն էլ հույս է հայտնել, որ առաջիկայում կհաջողվի Սիրիայում խաղաղություն եւ քաղաքական գործընթաց հաստատել: Իսկ Վաշինգտոնը Պուտինի հրամանին արձագանքել է՝ հայտարարելով, որ Ռուսաստանի զորքերի դուրսբերումը չի անդրադառնա Սիրիայում ԱՄՆ-ի գործողությունների եւ առաջնահերթությունների վրա:
Միխայիլ Սահակաշվիլին ազատության մեջ մնաց. Կիեւի դատարանը մերժեց Վրաստանի նախկին նախագահի նկատմամբ որպես խափանման միջոց կալանքն ընտրելու՝ դատախազության պահանջը: Նրա նկատմամբ քրեական հետապնդումը, սակայն, կշարունակվի. հաջորդ դատական նիստը նշանակված է դեկտեմբերի 14-ին: Ուկրաինայի գլխավոր դատախազությունը պատրաստվում է բողոքարկել դատարանի որոշումը: Գլխավոր դատախազը շարունակում է պնդել, որ Սահակաշվիլին Կիեւում բողոքի ակցիաներն անցկացնում է նախկին նախագահ Վիկտոր Յանուկովիչի եւ երկրից փախած օլիգարխ Սերգեյ Կուրչենկոյի փողերով:
Սահակաշվիլիին դատարանի առջեւ կանգնեցնելու ցանկություն ունեն նաեւ Վրաստանում. Թբիլիսին նախկին նախագահի արտահանձնման հարցով առայժմ պատասխան չի ստացել Կիեւից: Վրաստանում գործչի դեմ հեռակա կարգով մի քանի քրեական գործ են հարուցել:
Դեկտեմբերի 12-ին դոլարի արժեզրկմանը միացել է նաեւ եվրոն, իսկ ռուբլին թանկացել է: Դոլարի փոխարժեքը կազմել է 484 դրամ, եվրոյինը՝ 570, ռուբլունը՝ 8 դրամ 23 լումա, ֆունտինը՝ 646 դրամ:
Դեկտեմբերի 13-17-ը հանրապետությունում սպասվում է առանց տեղումների եղանակ: Օդի ջերմաստիճանը մի շարք շրջաններում 3-4 աստիճանով կնվազի: Երեւանում նույնպես տեղումներ չեն սպասվում: Մայրաքաղաքում գիշերը կդիտվի -3-5 աստիճան ցուրտ, ցերեկը՝ +5+7 աստիճան տաքություն: