ԱՄՆ գլխավոր դատախազ Ջեֆ Սեշնսը կարծում է, որ Նյու Յորքի պայթյունը ցույց տվեց, որ միգրացիոն համակարգում թերությունները ազգային անվտանգության խնդիր են, հաղորդում է AP-ն:
Նրա խոսքով՝ Նյու Յորքում տեղի ունեցած վերջին ահաբեկչական գործողությունները կատարվել են այն մարդկանց կողմից, ովքեր հայտնվել են Միացյալ Նահանգներում «ձախողված միգրացիոն քաղաքականության արդյունքում»:
Նա կրկին կոչ է արել Կոնգրեսին խստացնել միգրացիոն օրենսդրությունը՝ նշելով, որ Նախագահ Դոնալդ Թրամփի վարչակազմը քայլեր է ձեռնարկում միգրացիոն օերնքներին ավելի խիստ հետեւելու համար: Նա նշել է, որ վարչակազմը վարձել է 50 դատավոր եւ մտադիր է առաջիկա վեց ամսում վարձել եւս 60-ի, որպեսզի նրանք զբաղվեն «ԱՄՆ ներգաղթի համակարգում» առկա գործերով:
Նախօրեին ծնունդով Բանգլադեշից 27-ամյա Ակայեդ Ուլանը շարժման մեջ էր դրել ինքնաշեն պայթուցիկ սարքը Մանհեթենի արեւելյան մասում՝ Թայմս սքվերից ոչ հեռու, Նյու Յորքի ավտոբուսի տերմինալում: Ինքնապայթեցման արդյունքում Ուլանը այրվածքներ եւ կտրած վերքեր է ստացել, մոտակայքում գտնվող եւս 3 մարդ՝ թեթեւ մարմնական վնասվածքներ: Նա մեղադրվում է ահաբեկչության մեջ:
