Կանադայի խորհրդարանի պատգամավոր Թոնի Կլեմենտը կոչ է արել իր կառավարությանը դատապարտել Լեռնային Ղարաբաղում մարդու իրավունքների խախտումները եւ փորձել կանխել հակամարտության հետագա սրումը:
Խորհրդարանում Մարդու իրավունքների միջազգային օրը՝ դեկտեմբերի 10-ին, պատգամավորը անդրադարձել է Արցախում մարդու իրավունքների հետ կապված իրավիճակին:
Խոսելով այս տարի ամռանը տարածաշրջան կատարած իր այցի մասին՝ Կլեմենտը նշել է, որ տեսել է մարդու իրավուքների սարսափելի խախտումներ: Իսկ մարդիկ վերջիվերջո ցանկանում են խաղաղության մեջ ապրել:
«Մենք հանդիպեցինք մայրերի, ովքեր հակամարտության ընթացքում կորցրել են իրենց որդիներին: Ես այցելեցի այնպիսի վայրեր, որոնք անասելի սարսափի տեսարաններ էին: Ես հուսով եմ, որ Արցախում խաղաղություն եւ բարգավաճում կլինի, որտեղ մարդիկ կարող են կողք կողքի ապրել հարեւանների, այդ թվում Ադրբեջանի հետ: Ես կոչ եմ անում կառավարությանը դատապարտել տարածաշրջանում մարդու իրավունքների խախտումները եւ փորձել կանխել հակամարտության հետագա խորացումը», - ասել է նա:
