Ազգային ժողովն այսօր՝ դեկտեմբերի 13-ին, վավերացրեց Հայաստանի Հանրապետության եւ Ասիական զարգացման բանկի միջեւ «Հանրային արդյունավետության եւ ֆինանսական շուկաների ծրագիր. ենթածրագիր 1» վարկային համաձայնագիրը:
Ներկայացված օրինագծին կողմ քվեարկեց 61 պատգամավոր, դեմ՝ 37:
Ավելի վաղ NEWS.am-ը հայտնել էր, որ նախօրեին այս վարկային համաձայնագրի վերաբերյալ նախագծի հիմնական զեկուցող, ՀՀ ֆինանսների փոխնախարար Արմեն Հայրապետյանը նշել էր, որ նշված վարկային համաձայնագիրը բյուջետային աջակցության վարկ է, որի ստացումը հնարավորություն կտա սահուն կերպով անցկացնել 2017 թվականը եւ ունենալ ֆինանսական կայունության ապահովում:
Նրա խոսքով, վարկի գումարը 40 մլն դոլար է, վարկը տրվում է 15 տարով, որից 3 տարին՝ արտոնյալ, վճարումներ կատարվելու են 24 հավասար մասերով՝ 2020-2031 թվականները:
«Ելք» խմբակցության պատգամավոր Արտակ Զեյնալյանի հարցին, թե թե կա՞ հստակ ծրագիր, թե ինչի վրա է ծախսվելու այդ գումարը, փոխնախարարը պատասխանեց. «Կոնկրետ վարկային ծրագիրը ծախսային նպատակադրում չունի, հենց դրանով բյուջետային աջակցության վարկը տարբերվում է այլ տեսակի վարկերից: Քանի որ մեր բյուջետային տարին լինելու է դեֆիցիտով, այդ վարկը փակելու է եկամուտների եւ ծախսերի տարբերությունը»:
