Հայ-ամերիկյան երկկողմ համագործակցության շրջանակում խաղաղապահների ուսումնական կենտրոն է ստեղծվում: Ստեղծվելուց հետո այն կարող է հավաստագրվել եւ միջազգային կենտրոնի կարգավիճակ ստանալ: Այս մասին Հայաստանում ՆԱՏՕ-ի շաբաթվա մեկնարկին նվիրված մամուլի ասուլիսի ժամանակ հայտնեց Պաշտպանության նախարարության պաշտպանական քաղաքականության վարչության պետ Լեւոն Այվազյանը:
Նա հիշեցրեց, որ այս տարի ավարտվել է շինարարության առաջին փուլը: Մինչեւ վերջնականապես ավարտելը մի քանի փուլեր էլ կան, այդ թվում՝ անհրաժեշտ է տեխնիկապես զինել: Սակայն արդեն հաջորդ տարի ծրագրվում է կենտրոնում վարժանքներ անցկացնել՝ գնահատելու համար ՆԱՏՕ-ի պատրաստվածության ստանդարտներին խաղաղապահների ունակությունների համապատասխանությունը: «Կենտրոնի ստեղծման նպատակը միջազգային ստանդարտներին համապատասխանող խաղաղապահների պատրաստության ազգային կենտրոն ունենալն է, որովհետեւ մինչեւ հիմա պատրաստությունն անցկացվում է արտասահմանում»,- նշեց վարչության պետը՝ հավելելով, որ Աֆղանստանում եւ Կոսովոյում մասնակցության ծավալով Հայաստանը առաջին դիրքերում է: