Եվրոպական գործընկերների հետ Հայաստանի երկկողմանի համագործակցության կարեւոր հարցերից մեկը ռազմատեխնիկական համագործակցությունն է: Այս մասին դեկտեմբերի 13-ին Հայաստանում ՆԱՏՕ-ի շաբաթվա մեկնարկին նվիրված մամուլի ասուլիսի ժամանակ ասաց Պաշտպանության նախարարության պաշտպանական քաղաքականության վարչության պետ Լեւոն Այվազյանը:
ՊՆ ներկայացուցիչը համաձայն է, որ հակամարտությունների առկայությունը սկզբունքորեն որոշակի սահմանափակումներ է նախատեսում: «Սա, սակայն, չի նշանակում, որ թեման ամբողջությամբ փակված է եւ անհնար է զարգացնել: Ռազմատեխնիկական համագործակցությունը չի սահմանափակվում սպառազինության եւ տեխնիկայի գնումներով, կարելի է համագործակցել տեխնոլոգիաների, մշակումների հարցերում»,- նշեց Այվազյանը: Որպես համագործակցության հաջող օրինակ նա ներկայացրեց հայ-լեհական համատեղ ձեռնարկության ստեղծումը, հունական կողմի հետ լավ շփումները: «Տարբեր երկրների հետ են բանակցություններ վարվում, եւ ժամանակի ընթացքում մեծ արդյունք կունենանք»,- նշեց Այվազյանը:
Ի պատասխան ոչ պիտանի դարձած սպառազինության ոչնչացման համար ֆոնդի ստեղծմանն առնչվող հարցին՝ ՊՆ ներկայացուցիչը նշեց, որ ոչնչացման համար նախատեսված սպառազինության խմբաքանակը,- հիմնականում զրահամեքենաներ եւ տանկեր,- գերատեսչության հաշվեկշռից հանված է: Այս խմբաքանակի ամբողջ տեխնիկան շահագործման համար պիտանի չէ եւ նորոգման ենթակա չէ: Տեխնիկան կմասնատվի եւ կվաճառվի, իսկ ստացած գումարը կուղղի հումանիտար ականազերծմանը: Այվազյանը նշեց, որ առաժմ այսպիսի այլ տեխնիկա չկա, բայց ապագայում, եթե նոր խմբաքանակ հայտնվի, ծրագիրը կարող է շարունակվել: