«Անելիք բանկի» իրավաբան, 32-ամյա Հովհաննես Աթանյանի սպանության գործով վկա Էդուարդ Սահակյանը բերման կենթարկվի: Նման որոշում է կայացրել Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր` դեկտեմբերի 13-ին՝ պատճառաբանելով, որ վկան պատշաճ ծանուցված է եղել, սակայն, դատարան չի ներկայանում:
Այս գործը դատարանում է գրեթե մեկ տարի, սակայն, այս ընթացքում ընդամենը մի քանի նիստ է կայացել, այժմ վկաների հարցաքննության փուլն է:
Նշենք, որ գործը քննում է դատավոր Արմեն Բեկթաշյանը: Դատական նիստը հետաձգվեց մինչեւ դեկտեմբերի 26-ը:
Ավելի վաղ NEWS.am-ը հայտնել էր, որ Երեւանի Վարդանանց փողոցում 2015թ. նոյեմբերի 24-ին ժամը 20:30-ի սահմանում կրակոցներ էին հնչել, ինչի հետեւանքով տեղում մահացել էր «Անելիք բանկի» իրավաբան Հովհաննես Աթանյանը, պարզվել էր, որ սպանության մեջ կասկածվում է Մկրտիչ Պողոսյանը, որը նոյեմբերի 25-ին հայտնաբերվել եւ կալանավորվել էր: Նրան մեղադրանք է առաջադրվել ՔՕ 104-րդ հոդվածի 2-րդ մասի 2-րդ կետով՝ (Սպանությունը):
Սպանված Հովհաննեսի աները՝ Սամվել Գրիգորյանը, պատմել էր, որ մի քանի տարի առաջ Մկրտիչ Պողոսյանը ֆինանսական խնդիրների պատճառով գրավադրել է իրեն պատկանող հյուրանոցը, իսկ երբ չի կարողացել մարել պարտքը, «Անելիք» բանկը, որի իրավաբանն էր Հովհաննես Աթանյանը, վաճառքի է հանել հյուրանոցը:
Իսկ Մկրտիչ Պողոսյանի կինը` տիկին Կարինեն, մեզ հետ զրույցում նշել էր, որ իր ընտանիքին բանկը թալանել է եւ հենց այդ պատճառով է, որ ամուսինը գնացել է նման քայլի: Տիկին Կարինեի խոսքով՝ իրենց պատկանող «Անգելինա» ռեստորանի գույքի վաճառք է արվել անօրինական ձեւով. «Հարյուր միլիոնի ապրանքի վաճառք են արել անօրինական ձեւով` հիպոթեքով ու բանկն ու իրենք գրավի առարկա են սարքել 80 անուն շարժական գույք»: