Թուրքիայի քրդական «Ժողովուրդների դեմոկրատական» կուսակցության հայ պատգամավոր Կարո Փայլանը Հայոց պատրիարքի ընտրությունների ձգձգման ու պետության միջամտությունների պատճառի մասին մեջլիսում գրավոր հարց է ուղղել ՆԳ նախարար Սուլեյման Սոյլուին։

Ինչպես տեղեկացնում է Ստամբուլի հայկական «Ակոս»–ը, Կարո Փայլանը գրավոր հարցադրման մեջ նշել է, որ Հայոց պատրիարքը 8 տարի առողջական խնդիրների պատճառով չի կարողանում կատարել իր պարտականությունները եւ 2017–ի մարտի 15–ին հայ հոգեւորականները որպես պատրիարքի տեղապահ ընտրել են արք. Գարեգին Բեքչյանին։

Փայլանի հարցադրման մեջ եղել են հետեւյալ կետերը.

1.Ինչ հիմքով է պետությունը հայ համայնքի պատրիարքի ընտրություններին միջամտում։

2.Կա արդյոք միջամտությու՞ն, ինչպես պնդում է Ստամբուլի նահանգապետ Վասիփ Շահինը։

3. Երբ հայ համայնքում պատրիարքի ընտրությունների հետ կապված համաձայնություն կա եւ աշխատանքներ արվել են, ինչն է ձգձգման պատճառը։

4. Նախագահ Էրդողանը Հունաստանում ասաց, որ Արեւմտյան Թրակիայում չեն կարողանում ընտրել գլխավոր իմամին։ Այդ համատեքստում ինչպես եք մեկնաբանում այն փաստը, որ Թուրքիայում հայ համայնքը երկար տարիներ չի կարողանում ընտրել պատրիարքին։

5. Երբ է վերջանալու Հայոց պատրիարքի ընտրությունների անցկացման դեմ արգելքը։