ԱՄՆ-ի ռազմական ակտիվության աճը Կորեական թերակղզու շրջանում հղի է Հյուսիսային Կորեայի շուրջ իրավիճակի հետագա վատթարացմամբ: Այս մասին Մոսկվայում կայացած ճեպազրույցի ժամանակ հայտարարել է Ռուսաստանի Դաշնության արտաքին գործերի նախարարության մամուլի քարտուղար Մարիա Զախարովան, հաղորդում է «Ինտերֆաքս»-ը:
«Ցավով նշում ենք, որ այս ֆոնին ԱՄՆ-ն շարունակում է իր ոչ կառուցողական գիծը, որն… ուղղված է Հյուսիսարեւելյան Ասիայում ռազմական գործողությունների ակտիվացմանը»,- ասել է Զախարովան` խոսելով ԱՄՆ-ի, Հարավային Կորեայի եւ Ճապոնիայի մասնակցությամբ Կորեական թերակղզում դեկտեմբերին անցկացվող զորավարժությունների մասին:
«Մենք համոզված ենք, որ «մկանների այսպիսի խաղը» ոչ միայն չի նպաստում լարվածության նվազմանը, այլ հակառակը՝ հղի է ամենալուրջ հետեւանքներով ենթատարածաշրջանում իրավիճակի համար»,- նշել է նա:
«Մենք կոչ ենք անում ներգրավված բոլոր կողմերին, առաջին հերթին՝ ԱՄՆ-ին եւ Հյուսիսային Կորեային, ձեռնպահ մնալ ցանկացած քայլից, որը կարող է հանգեցնել հակամարտության սրմանը, եւ անմիջապես անցնել համատեղ գործնական աշխատանքի` Կորեական թերակղզու խնդիրների ամբողջ փաթեթի համար քաղաքական եւ դիվանագիտական լուծում գտնելու ուղղությամբ»,- ընդգծել է Զախարովան:
Նշենք, որ ընթացիկ զորավարժությունները նպատակ ունեն հետեւել Հյուսիսային Կորեայի կողմից արձակված հրթիռների թռիչքներին:
Փհենյանը պարբերաբար խիստ քննադատության է ենթարկում Կորեական թերակղզում անցկացվող Միացյալ Նահանգների եւ նրա դաշնակիցների համատեղ զորավարժությունները` հայտարարելով, որ դրանք ուղղված են Հյուսիսային Կորեայի վրա հարձակման նախապատրաստմանը: