Երեւանի «Լիա» գեղեցկության սրահում մեկ տարի առաջ տեղի ունեցած սպանության գործով Երեւանի Շենգավիթ վարչական շրջանի ընդհանուր իրավասության դատարանում այսօր` դեկտեմբերի 13-ին, ցուցմունք տվեց գեղեցկության սրահի աշխատակից Քրիստինե Սարգսյանը: Նա նշեց, որ ամբաստանյալներից ճանաչում է միայն Պետրոս Իսրայելյանին: Վկայի պնդմամբ, դեպքի վերաբերյալ մանրամասներ չգիտի, սպանության մասին էլ ոստիկանության բաժանմունքում ոստիկաններից է իմացել: Քրիստինե Սարգսյանը պատմեց, որ 2016թ. նոյեմբերի 13-ին սովորականի նման աշխատանքի է գնացել, հաճախորդին սպասարկելիս է եղել, երբ գեղեցկության սրահ է մտել Պետրոս Իսրայելյանի կինը` Անժելան:
«Հուզված էր, հարցրեցի` ինչ է եղել, ասեց` մեր Գեւին հիվանդանոց են տարել: Որից հետո գնաց տուն` ասելով, որ Գեղամին պետք է հաց տա: Այնուհետեւ ոստիկանության համազգեստով մի քանի հոգի մտան, ասացին` հագնվեք, գնում ենք: Ոստիկանությունում երկար ժամանակ պահել են ինձ, ոստիկաններից եմ իմացել, որ մարդ է մահացել»:
Վկան պատմեց, որ այդ օրը գեղեցկության սրահի տարածքում անցուդարձ է նկատել, բայց թե ովքեր են եղել` չի կարող ասել: Նրա խոսքով կրակոցների ձայներ ու գոռգոռոցներ չի լսել:
Վկան նշեց, որ մինչեւ այժմ էլ աշխատում է «Լիա» գեղեցկության սրահում, նրա տնօրենը Պետրոս Իսրայելյանի կինն է` Անժելան:
Դատարանը որոշում կայացրեց հրապարակել վկայի նախաքննական ցուցմունքը, ըստ որի, վկան պատմել է, որ մեկ անգամ է եղել գեղցկության սրահի նկուղային հարկում, որտեղ կատարվել է սպանությունը: Այդ սենյակ հաճախակի են գնացել Գոռն ու Գեղամն` իրենց ընկերների հետ:
«Դեպքի օրը եղել եմ աշխատանքի: Ցերեկը, երբ հաց էինք ուտում, Անժելան մեզ հետ էր, եկավ սենյակ եւ ասաց, որ Գեղամը եւս սոված է, ճաշ լցրեց եւ գնաց: Անժելան ասաց, որ գեղեցկության սրահի երկաթյա դուռը փակենք, հետո տեսա, որ մի քանի մեքենա եկան, մտան շենքի բակ, հետո գեղեցկության սրահի դիմացի հատվածով շատ մարդիկ էին գնում: Նկատեցի, որ երկու տղամարդ արագ քայլելով նստեցին գեղեցկության սրահի մոտ կանգնած մուգ գույնի մեքենան եւ գնացին: Անժելան հուզված եկավ մեզ մոտ, այնուհետեւ Պետրոս Իսրայելյանի քույրը` Սուսաննան եկավ եւ Անժելային ասաց` գնանք տուն: Այնուհետեւ ոստիկանության աշխատակիցներն եկան եւ մեզ ասացին, որ գնանք իրենց հետ»:
Վկայի հարցաքննություն այսքանով ավարտվեց:
Դատական նիստը հետաձգվեց վկաների բացակայության պատճառաբանությամբ մինչեւ դեկտեմբերի 20-ը:
Նշենք, որ 2016թ. նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը: Այս գործով կա երեք ամբաստանյալ.
Պետրոս Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ա. Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Ա. Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով: