Իսլամական պետությունների ղեկավարները Արեւելյան Երուսաղեմը ճանաչել են որպես Պաղեստինի մայրաքաղաք, հաղորդում է AFP-ն: Ստամբուլում Իսլամական համագործակցության կազմակերպության (ԻՀԿ) արտակարգ գագաթաժողովի ժամանակ հայտարարվել է, որ կազմակերպությունը ճանաչում է «Արեւելյան Երուսաղեմը որպես Պաղեստինի պետության մայրաքաղաք» եւ առաջարկում է «բոլոր երկրներին ճանաչել Պաղեստինի պետությունը եւ Արեւելյան Երուսաղեմը՝ որպես նրա օկուպացված մայրաքաղաք»:
ԻՀԿ-ի հայտարարության մեջ նշվում է, որ ԱՄՆ նախագահ Դոնալդ Թրամփի՝ Երուսաղեմը որպես Իսրայելի մայրաքաղաք ճանաչման մասին որոշումը «չունի իրավական ուժ» եւ «դիտավորությամբ խաթարում է խաղաղությանն ուղղված բոլոր ջանքերը»՝ զարկ տալով «ծայրահեղականությանն ու ահաբեկչությանը»:
ԻՀԿ-ն Թրամփի քայլը դիտարկում է «որպես ԱՄՆ վարչակազմի հայտարարություն՝ Մերձավոր Արեւելքում խաղաղության հովանավորի դերից հրաժարվելու մասին»:
Վաշինգտոնի քայլը «խրախուսում է Իսրայելին շարունակել գաղութատիրության, ապարտեիդի եւ էթնիկ զտումների քաղաքականությունը»: