Եվրոպական միությունը (ԵՄ) կոչ է անում Մեծ Բրիտանիային հավատարիմ մնալ բրեքսիտի շուրջ բանակցությունների առաջին փուլի ընթացքում ձեռք բերված պայմանավորվածություններին, հաղորդում է DW-ն:
«Մենք չենք հանդուրժի, եթե այդ արդյունքները կասկածի տակ դրվեն», - հայտարարել է բանակցություններում ԵՄ պատվիրակության ղեկավար Միշել Բարնյեն: Նրա խոսքերով՝ այդ պայմանավորվածությունները արդեն հաստատված են եւ պետք է իրենց արտահայտությունը գտնեն իրավական ուժ ունեցող պայմանագրի մեջ:
Հիշեցնենք, որ դեկտեմբերի 8-ին Եվրահանձնաժողովի նախագահ Ժան-Կլոդ Յունկերի եւ Մեծ Բրիտանիայի վարչապետ Թերեզա Մեյի միջեւ ստորագրված համաձայնագրերը, որոնք նշանավորեցին բանակցությունների առաջին փուլի ավարտը, պետք է հաստատվեն ԵՄ պետությունների եւ կառավարությունների ղեկավարների կողմից:
ԵՄ ներկայացուցիչների դժգոհությունը բխում է բրիտանական նախարարի՝ բրեքսիտի վերաբերյալ որոշ հայտարարություններից, ով կնքված պայմանագրերը մեկնաբանել է միայն որպես մտադրությունների ցուցադրություն:
Դեկտեմբերի 13-ին կայացած բանավեճի ժամանակ Եվրախորհրդարանի պատգամավորները վերահաստատեցին իրենց համերաշխությունը Իռլանդիայի քաղաքացիների, ինչպես նաեւ Մեծ Բրիտանիայում բնակվող Եվրամիության այլ երկրների քաղաքացիների հետ, որոնց իրավունքները պետք է պաշտպանված լինեն բրեքսիտի ընթացքում: