ԱՄՆ-ն ստեղծել է ոչ կառուցողական մթնոլորտ իրանական ատոմի վերաբերյալ համաձայնագրի իրականացման շուրջ, թեեւ գործարքը պահանջում է արդյունավետ քայլեր: Այս մասին դեկտեմբերի 13-ին Իրանի համատեղ հանձնաժողովի եւ միջազգային միջնորդների «վեցնյակի» (ՄԱԿ Անվտանգության խորհրդի 5 մշտական անդամներ եւ Գերմանիա) հանդիպումից հետո ասել է Իրանի Իսլամական Հանրապետության փոխարտգործնախարար Աբաս Արագչին, հաղորդում է ՏԱՍՍ-ը:
Վիեննայում հանձնաժողովի անդամները քննարկել են Իրանի միջուկային ծրագրի վերաբերյալ Համատեղ համապարփակ գործողությունների ծրագրի իրականացման ընթացքը:
«Մենք մի քանի նկատողություններ ունենք այն մասին, թե ինչպես է ՀՀԳԾ-ն իրականացվում ԱՄՆ կառավարության կողմից: Նրանք ստեղծել են ոչ կառուցողական մթնոլորտ», - ասել է Արագչին: «ՀՀԳԾ-ն պահանջում է բոլոր կողմերին կառուցողական ձեւով կատարել իրենց պարտավորությունները, եւ հենց ԱՄՆ-ն դա չի անում»:
Նրա խոսքով՝ անհրաժեշտ է խուսափել ցանկացած միջամտությունից, որը կարող է խանգարել ՀՀԳԾ-ի իրականացմանը: «Այս հարցում միակ դատավորը կարող է լինել ԱՄԷԳ-ը: Ոչ ոք իրավունք չունի դատելու Իրանին, բացառությամբ ԱՄԷԳ -ի, որը մշտապես ասում է, որ Իրանը հետեւում է գործարքի պայմաններին», - ընդգծել է Արագչին:
