Ազգային ժողովն այսօր շարունակել է արտահերթ նիստը: Խորհրդարանը 61 կողմ, 37 դեմ ձայնով վավերացրել է Ասիական զարգացման բանկից 40 մլն դոլարի չափով վարկ ստանալու մասին համաձայնագիրը: Երկրորդ ընթերցմամբ եւ ամբողջությամբ ընդունվել է նաեւ Ընտանեկան բռնության մասին աղմկահարույց օրինագիծը:
Հարկային օրենսգրքում փոփոխությունների նախագծի քվեարկության ժամանակ էլ պատգամավորներն անընդհատ վարման կարգով խոսքի իրավունք են խնդրել: Խորհրդարանի խոսնակն ի վերջո մոռացել է, թե ինչ նախագիծ էր քվեարկության դրել: Աժիոտաժի պատճառով Արա Բաբլոյանը վերջնականապես շփոթության է մատնվել եւ առանց քվեարկության հաջորդ օրինագծին անցել: Հուշել են՝ չքվեարկեցինք:
Այսօր արդեն սկսել են քննարկել բյուջետային համակարգի եւ պետական պարտքի մասին օրինագծերը: «Ծառուկյան» խմբակցությունը որոշել է դեմ քվեարկել: Նաիրա Զոհրաբյանը կարծում է, որ սրանով կառավարությունը պարզապես հերթական անգամ արտաքին պարտք է ուզում ներգրավել, իսկ արդյունքում երկիրը փակուղում է հայտնվելու: Վաղն արդեն պատգամավորները երկրորդ ընթերցմամբ քննարկելու եւ քվեարկելու են այսօր առաջին ընթերցմամբ ընդունված չորս նախագծեր: Ազգային ժողովի արտահերթ նիստն այդքանով կավարտվի:
Լեւոն Ալթունյանը հերթական սկանդալային հայտարարությունն է արել: «Ազատության» եթերում առողջապահության նախարարը հայտարարել է, որ Հայաստանում մինչեւ 15 տարեկան աղջիկների 25%-ը սեռական կյանքի փորձ ունի: Զրույցի թեման, ի դեպ, գարդասիլով պատվաստումն է եղել: Այս հայտարարությունն իրարանցում է առաջացրել, իսկ պատգամավորները Լեւոն Ալթունյանից պահանջում են փաստական տվյալներ ներկայացնել: Մեկնաբանության խնդրանքով լրագրողները դիմել են նախարարի կուսակից Գագիկ Մելիքյանին: Հարցազրույցից հատված դիտելուց հետո պատգամավորն այլայլվել է ու հրաժարվել պատասխանել: «Ծառուկյան» խմբակցությունից Գեւորգ Պետրոսյանն էլ նախարարին խորհուրդ է տվել գարդասիլի նախագիծն իրականացնելու համար, իր խոսքով, մերկապարանոց հայտարարություններ չանել: Իրավաբան պատգամավորը Լեւոն Ալթունյանի հայտարարության մեջ նաեւ իրավական խնդիր է տեսնում եւ հիշեցնում, որ անչափահասի հետ սեռական հարաբերությունը քրեական պատասխանատվություն է ենթադրում:
Թանկացումները շարունակվում են, եւ տարեվերջին պատկերը որոշակիորեն ամբողջանում է: Մեկ տարվա ընթացքում ամենաշատը թանկացել է կարագը. անցյալ տարվա նոյեմբերի համեմատ՝ 40.7 տոկոսով: Ընդ որում, միայն նոյեմբերին այն թանկացել է 5.5 տոկոսով: Ամենաշատը թանկացած 10 մթերքների ցանկի երկրորդ տեղում խոզի միսն է, որը թանկացել է 40.3 տոկոսով, երրորդ տեղում՝ կարտոֆիլը 29 տոկոս թանկացմամբ: Զգալի թանկացել են նաեւ ձուկը, գառան, տավարի եւ հորթի միսը, պանիրը, կաթնաշոռն ու մանկական սնունդը: Ընդհանուր առմամբ, «միս» խմբում գներն աճել են 9.6 տոկոսով, «ձուկ եւ ծովամթերք» խմբում՝ 25.1 տոկոսով, «կաթնամթերք, պանիր ու ձու» խմբում՝ 4.3 տոկոս:
Թանկացումների մասին վերջերս խոսում են գրեթե բոլորը, իսկ այդ հարցի շուրջ որոշ պատգամավորների հայտարարություններ լայն արձագանք են գտել: Քննադատության թիրախում էին հայտնվել հատկապես Հանրապետական խմբակցությունից Խոսրով Հարությունյանն ու Հակոբ Հակոբյանը: Այսօր Ազգային ժողովի շենքի դիմաց հերթական արձագանքն արտասովոր ակցիայի տեսքով է եղել:
Հյուսիսային Կորեայի միջուկային հզորությունների թեման շարունակում է արդիական մնալ: Փհենյանն արդեն հայտարարել է, որ շարունակելու է հզորացնել միջուկային ներուժը՝ նաեւ ավելի շատ ու տարբեր զինատեսակներ մշակելով ու արտադրելով:
Մինչ այդ, փորձագետները որոշել են կանխատեսել, թե երբ կարող է միջուկային պատերազմ սկսվել: Ամերիկացի հայտնի միջուկային փորձագետ Ջեյմս Լյուիսը կարծում է, որ այն կմեկնարկի 2019-ի մարտին, ԱՄՆ նախագահի թվիթից: Նա մոդելավորել է միջուկային զենքի կիրառմամբ ԱՄՆ-ի եւ Հյուսիսային Կորեայի միջեւ հնարավոր հակամարտության առաջացման սցենարը: 2019-ի փետրվարին, ըստ փորձագետի, ամերիկա-կորեական ավանդական զորավարժություններ կանցկացվեն, որի ընթացքում քաղաքացիական ինքնաթիռ կոչնչացվի: Դրանից հետո Դոնալդ Թրամփը Twitter-ում կգրի. «Փոքրիկ մարդ-հրթիռը երկար չի դիմանա»: Սա ԿԺԴՀ-ում Կիմ Չեն Ընին ուղղված սպառնալիք եւ միջուկային հարված հասցնելու ազդանշան կդիտարկեն: Փորձագետը նաեւ կարծում է, որ առաջին հրթիռները կարձակվեն Հարավային Կորեայի եւ Ճապոնիայի ուղղությամբ, որտեղ ամերիկյան ռազմակայաններ կան: Ջեյմս Լյուիսը, սակայն, չի ներկայացրել աշխարհում միջուկային պատերազմի հետեւանքները: Այս ֆոնին Ռուսաստանի արտգործնախարարությունն ԱՄՆ-ին զգուշացրել է, որ Կորեական թերակղզու շրջանում ռազմական ակտիվության աճը հղի է Հյուսիսային Կորեայի շուրջ իրավիճակի հետագա վատթարացմամբ:
Վանաձորում ողբերգական դեպք է տեղի ունեցել. 50-ամյա քաղաքացին գնացքի տակ է ընկել ու տեղում մահացել։ Դեպքը տեղի է ունեցել երկաթգծի՝ Տարոն թաղամասին հարակից հատվածում։ Մեր տեղեկություններով՝ մահացածը Վանաձորի բնակիչ Սամվել Գեւորգյանն է: Գնացքը բախվել է ռելսերի վրայով քայլող տղամարդուն. փրկարարներն ու իրավապահները գտել են նրա մասնատված մարմինը: Նշենք, որ մեկ ամսվա ընթացքում սա երկրորդ նման դեպքն է Վանաձորում: Նոյեմբերի 23-ին էլ գնացքի տակ էր ընկել 26-ամյա վանաձորցի Լեւոն Սուրենյանը: Երիտասարդը հրաշքով ողջ էր մնացել:
Դոլարի ու եվրոյի արժեզրկմանը միացել է նաեւ ռուբլին: Դեկտեմբերի 13-ին դոլարի փոխարժեքը կազմել է արդեն 483 դրամ, եվրոյինը՝ 568, ռուբլունը՝ 8 դրամ 18 լումա, ֆունտինը՝ 645 դրամ:
Դեկտեմբերի 14-ին հանրապետությունում սպասվում է առանց տեղումների եղանակ: Օդի ջերմաստիճանը մի շարք շրջաններում 3-4 աստիճանով կնվազի, հետո նույնքան կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -4-6 աստիճան ցուրտ, ցերեկը՝ +6+8 աստիճան տաքություն: