Առողջապահության ոլորտում էժանացման նախանշներ կան։ Այս մասին այսօր՝ դեկտեմբերի 14-ին, կառավարության նիստից հետո իր ճեպազրույցի ժամանակ հայտարարել է առողջապահության նախարար Լեւոն Ալթունյանը։

«Մենք նախաձեռնել ենք կենտրոնացված գնումների նախագիծ, որով պետական պատվերով ձեռք բերվող դեղերի գների 20-23 տոկոս իջեցում կունենանք»,-նշեց նախարարը։

Հարցին, թե արդյոք հունվարի 1-ից դեղերի թանկացում սպասվում է, նա պատասխանեց, որ դեղերի մատակարարման տենդերներում  դեղերի թանկացումները անմիջապես հունվարի 1-ից  չի նախատեսվում, այլ տարբեր ժամանակներում:

Խոսելով կադրերի կրճատման մասին՝ Ալթունյանը շեշտեց․ «Կադրերի կրճատումը զուգորդվում է  կադրերի վերապատրաստման եւ այլ աշխատատեղերում տեղավորման գործընթացներով»։

Լրագրողները, անդրադառնալով «Ազատության» «Ֆեյսբուքյան ասուլիս» հաղորդմանը ժամանակ նախարարի կողմից հնչեցրած հայտարարությանը, թե Հայաստանում մինչեւ 15 տարեկան աղջիկների 25 տոկոսը սեռական կյանքի փորձ ունեն, նշեցին, որ  սա առաջին անգամ չէ, որ նախարարը շփոթում է, որին ի  պատասխան նախարարը ընդգծեց, որ նախարարությունը արդեն պարզաբանում տվել է այդ հարցով․ «Խոսքը տարիներ առաջ կատարված հարցման մասին է, սակայն ուղիղ եթերի ժամանակ տեղի է ունեցել շփոթություն՝ 25 տոկոս տղաների եւ 1 տոկոս աղջիկների փոխարեն նշել եմ 25 տոկոս աղջիկներ»։