Այսուհետեւ Առողջապահության նախարարության պետական գնումների ծրագրի մեջ կկարողանան ընդգրկել դեղամիջոցներ, որոնք երկրի տարածքում գրանցված չեն: Համապատասխան որոշումը հավանություն ստացավ կառավարության դեկտեմբերի 14-ի նիստում: Որոշման նախագիծը ներկայացրեց առողջապահության նախարար Լեւոն Ալթունյանը:
Բավական է, որ դեղորայքը պատշաճ արտադրական պրակտիկայի հավաստագիր ունենա՝ տրված արտադրող երկրի համապատասխան իրավասու մարմնի կողմից, ԱՀԿ նախնական որակավորում եւ/կամ գրանցված լինի Եվրամիության անդամ ցանկացած երկրում, ԱՄՆ-ում կամ Ճապոնիայում:
Մատակարարողը պարտավորվում է փաստաթղթերի փաթեթ ներկայացնել, որոնք Հայաստանի օրենսդրության համաձայն անհրաժեշտ են դեղամիջոցների պետական գրանցման համար, կամ ակադեմիկոս Էմիլ Գաբրիելյանի անվան «Դեղերի եւ բժշկական տեխնոլոգիաների փորձաքննության կենտրոն» ՓԲԸ ընդհանուր տեխնիկական փաստաթղթերի փաթեթ (դոսյե), կամ մրցույթում շահելու դեպքում դեղամիջոցի գրանցման համար անհրաժեշտ փաստաթղթեր ներկայացնելու մասին տեղեկանք: Եթե դոսյեում որոշ փաստաթղթեր բացակայում են, մատակարարողը պետք է ԱՆ պահանջով դրանք ներկայացնի 15 օրացուցային օրվա ընթացքում: Հրաժարվելու դեպքում հայտը մերժվում է:
