Կառավարությունը Գերմանական զարգացման բանկի՝ KfW-ի հետ 18,5 մլն եվրոյի վարկային համաձայնագիր կկնքի: Համապատասխան որոշումը հավանություն ստացավ կառավարության դեկտեմբերի 14-ի նիստում: Նախագիծը ներկայացրեց ֆինանսների նախարար Վարդան Արամյանը: Գումարը կտրամադրվի «Ջրային պաշարների/Ախուրյան I ինտեգրված կառավարում» ծրագրի երկրորդ փուլի շրջանակում:
Համապատասխան պայմանագիրը կստորագրվի Ֆինանսների նախարարության, KfW-ի եւ Ջրային տնտեսության պետական կոմիտեի միջեւ: Միջոցները կուղղվեն ծրագրի ընթացիկ աշխատանքների իրականացմանը, Կումայրիի ոռոգման թունելի ընդլայնմանը, ջրատար համակարգի ստեղծմանը եւ 740 հա տարածքի ավելի արդյունավետ ոռոգման համար սարքավորումների ձեռքբերմանը եւ տեղադրմանը:
Վարկը տրամադրվում է մինչեւ 15 տարի արտոնյալ ժամկետով: Մայր գումարի մարման ժամկետն է 2023-2033 թվականները: Տոկոսադրույքը լողացող է: Վարկային համաձայնագրի ստորագրումից հետո 12-րդ ամսից սկսած կառավարման համար միանվագ վճարումը կկազմի վարկի գումարի 1 տոկոսը:
Հիշեցնենք, որ 2014 թվականին 50 մլն եվրոյի վարկային պայմանագիր է ստորագրվել եւ 2 մլն եվրոյի դրամաշնորհային պայմանագիր ծրագրի առաջին փուլի իրականացման համար, որը նախատեսում է Ախուրյան գետի վրա 25 մլն խոր.մետր ծավալով Կապսի ջրամբարի վերականգնում:
