Հինգշաբթի առավոտյան Հունաստանում Սաուդյան Արաբիայի դեսպանատան վրա են հարձակվել «Ռուբիկոն» խմբավորման անարխիստները՝ ի նշան բողոքի Եմենում ռմբակոծությունների դեմ. անարխիստները կոտրել են պահատնակը եւ ինչ-որ առարկաներ նետել դիվանագիտական առաքելության տարածք, փոխանցում է «ՌԻԱ Նովոստի»-ն:
Հարձակմանն առնվազն 6 մարդ է մասնակցել, որոնք եկել են մոտոցիկլետներով:
«Ռուբիկոնի» հայտարարության մեջ նշված է, որ խմբավորումը բողոքում է Սաուդյան Արաբիայում թագավորական ընտանիքի հաստատած ֆեոդալական օրենքների դեմ, դրանք ամբողջ Մերձավոր Արեւելքում տարածելու փորձերի եւ մնացյալ աշխարհ արտահանելու մտադրությունների դեմ:
Հայտարարության մեջ նշված է, որ այն, ինչ անում է, այսպես կոչված, «Իսլամական պետությունը», Սաուդյան Արաբիայում տեղի է ունենում տասնամյակներ շարունակ՝ ամբողջ «քաղաքակիրթ աշխարհի» աչքերի առաջ. մարզադաշտերում գլուխներ եւ ձեռքեր են կտրում, կանանց են նվաստացնում, նույնասեռականներին են ոչնչացնում: Այս երկրում ստրկությունը վերացել է միայն 1962 թվականին, բայց վերացվել է միայն թղթի վրա, իսկ տնտեսական միգրանտներն ապրում են իրական ստրկության պայմաններում:
«Սաուդյան Արաբիան միջազգային հանդուրժողականությունը գնում է՝ նավթադոլարներով վճարելով»,- նշված է անարխիստների հայտարարությկան մեջ, որոնք քննադատել են սաուդցիներին զինամթերք վաճառելու Հունաստանի կառավարության ծրագրերը:
Հայտարարության մեջ առանձնահատուկ նշված է, որ սաուդյան թագավորությունը «Եմենում անհասկանալի պատերազմ» է վարում, որտեղ իսկական դժոխք է ստեղծվել տասնյակ հազարավոր մարդկանց համար:
