Կարմիր խաչի միջազգային կոմիտեի առաքելության (ԿԽՄԿ) ներկայացուցիչները այցելել են Լեռնային Ղարաբաղում պահվող Ադրբեջանի քաղաքացիներին: Այս մասին NEWS.am-ի հարցմանն ի պատասխան հայտնել է ԼՂՀ-ում ԿԽՄԿ-ի առաքելության մամուլի ծառայության ներկայացուցիչ Էթերի Մուսայելյանը:
«Դեկտեմբերին Կարմիր խաչի միջազգային կոմիտեն հերթական անգամ այցելել է ադրբեջանցի կալանավորներին, որոնք ձերբակալվել են Լեռնային Ղարաբաղի հակամարտության առնչությամբ: ԿԽՄԿ-ն կանոնավոր կերպով շարունակում է այցելել հակամարտության առնչությամբ ձերբակալված անձանց: Իր մանդատի համաձայն՝ ԿԽՄԿ-ն այցելում է կալանավորներին՝ կալանքի տակ պահման պայմանների, նրանց հանդեպ վերաբերմունքի մոնիթորինգի նպատակով, ինչպես նաեւ՝ որպեսզի բանտարկյալները հնարավորություն ունենան շփվել հարազատների հետ»,- նշեց Էթերի Մուսայելյանը:
Հիշեցնենք, որ ԼՂՀ-ում պահվում է Ադրբեջանի երեք քաղաքացի` Շահբազ Գուլիեւը եւ Դիլհամ Ասկերովը, որոնց դեմ դատական որոշում կա, ինչպես նաեւ զինծառայող Էլնուր Հուսեյնզադեն, որի նկատմամբ հետաքննությունը դեռ շարունակվում է: