«Ելք» դաշինքը նիստ է արել ու որոշել Հայաստանի նախագահի թեկնածու առաջադրել պատգամավոր Արտակ Զեյնալյանին: Նիկոլ Փաշինյանն ասում է՝ Զեյնալյանն ամենահարմար թեկնածուն է նախագահի գործառույթներն իրականացնելու համար:

Բայց «Ելք» խմբակցությունը միայնակ չի կարողանա նախագահի թեկնածու առաջադրել: Սահմանադրության փոփոխությունների համաձայն՝ դրա համար անհրաժեշտ է պատգամավորների առնվազն մեկ քառորդի ստորագրությունը: Դաշնակցության վրա հույս դնել «Ելք»-ը չի կարող. նախ՝ ՀՅԴ-ի խմբակցությունն ամենափոքրաթիվն է խորհրդարանում, բացի այդ՝ այն Հանրապետականի կոալիցիոն գործընկերն է: Արտակ Զեյնալյանի առաջադրման հարցը որոշել են քննարկել «Ծառուկյան» խմբակցության հետ: «Ծառուկյան» խմբակցությունը, սակայն, դեռ չի քննարկել «Ելք»-ի առաջադրած թեկնածուին սատարելու հարցը։

ՀՅԴ-ն նորմալ է համարում նախագահի թեկնածու առաջադրելու՝ «Ելք»-ի ցանկությունը: Դաշնակցական պատգամավոր Աղվան Վարդանյանը, սակայն, չի կարծում, որ նախաձեռնությունը հաջողություն կունենա: Նշենք, որ 2018 թվականին, գործող նախագահի լիազորությունների ժամկետի ավարտից եւ ամբողջությամբ խորհրդարանական կառավարման համակարգի անցնելուց հետո, հանրապետության նախագահին ընտրելու է Ազգային ժողովը: Քվեարկությունը տեղի է ունենալու փակ, գաղտնի: Առաջին փուլով ընտրված կհամարվի օրենսդիրների առնվազն 3/4-ի՝ 79 պատգամավորի «կողմ» քվեն ստացած թեկնածուն: Սա նշանակում է, որ եթե ՀՀԿ-ն եւ ՀՅԴ-ն որոշեն նախագահի թեկնածու առաջադրել, նույնիսկ «Ծառուկյան» խմբակցության աջակցության պարագայում, փաստորեն, անհավանական կդառնա «Ելք»-ի թեկնածուի ընտրվելը:

Ազգային ժողովն այսօր ընդունեց դեկտեմբերի 12-ից գումարված արտահերթ նիստի օրակարգի մնացած օրինագծերը: Այս նիստի օրակարգում ներառված հարցերը սպառվեցին, բայց պատգամավորները հանգստանալու ժամանակ դեռ չեն ունենա: Կառավարությունը խորհրդարանի եւս մեկ արտահերթ նիստ է նախաձեռնել: Այն կգումարվի հաջորդ երեքշաբթի՝ դեկտեմբերի 19-ին:

Ամանորի տոների ընթացքում ոչ աշխատանքային օրերի թիվը կկրճատվի. Կարեն Կարապետյանը դեռ անցյալ տարի էր հայտարարել, որ դրանք շատ են: Կառավարությունն այսօրվա նիստում որոշել է կրճատել սուրբծննդյան տոնին նախորդող հանգստյան օրերի թիվը: Որոշումը, սակայն, ուժի մեջ կմտնի 2019 թվականից:

Կարեն Կարապետյանն այսօր հիշեցրել է, որ հաջորդ տարի հանրապետությունում երեք խոշոր իրադարձություն է սպասվում՝ Մայիսյան հերոսամարտերի 100-ամյակի, Երեւանի հիմնադրման 2800-ամյակի միջոցառումներ, հոկտեմբերին էլ՝ Ֆրանկոֆոնիայի գագաթնաժողով: Ակնկալվում է, որ Հայաստան մեծ թվով զբոսաշրջիկներ են այցելելու: Վարչապետն ուզում է, որ հավուր պատշաճի դիմավորենք հյուրերին. հանձնարարել է բարեկարգել Երեւանի եւ մարզկենտրոն քաղաքների մուտքի ու ելքի ճանապարհները եւ շրջակայքը:

Գործադիրը պատրասվում է եւս մեկ վարկ վերցնել, այս անգամ՝ Գերմանական զարգացման բանկից (KfW): 18.5 մլն եվրոն ծախսելու են Կումայրիի ոռոգման թունելի ընդլայնման, ջրատար համակարգի ստեղծման եւ ոռոգման սարքավորումների ձեռքբերման ու տեղադրման համար: Բանկը Հայաստանին նաեւ 5.3 մլն եվրո կտրամադրի, բայց արդեն դրամաշնորհի տեսքով: Այս ծրագիրն ուղղված է կլիմայական ռիսկերից գյուղատնտեսական հատվածի պաշտպանությանը:

Իսկ նիստից հետո լրագրողների հետ զրուցել է առողջապահության նախարարը: Լեւոն Ալթունյանին հարցրել են գարդասիլի թեմայով խոսելիս արած սկանդալային հայտարարության մասին, թե Հայաստանում մինչեւ 15 տարեկան աղջիկների 25%-ը սեռական կյանքի փորձ ունի: Ավելի ուշ, նախարարությունը, իհարկե, շտկել էր անընդհատ թվերը խառնող Ալթունյանի հայտարարությունը, այսօր էլ նախարարն ինքն է հաստատել. 25%-ը վերաբերում էր տղաներին:

Հայաստանն ԱՄՆ քաղաքացու նկատմամբ հետախուզում է հայտարարել, որին կասկածում են հանրապետությունում ահաբեկչական գործողություններ ծրագրելու մեջ: Հետախուզվողն ազգությամբ հայ է: Ազգային անվտանգության ծառայության տեղեկացմամբ՝ Ռ.Ք.-ն 2017 թվականի սեպտեմբերին Facebook-ում «Martin Avagyan» օգտատիրոջ կեղծ տվյալներով անհատական էջ է գրանցել, որի միջոցով նյութեր է հրապարակել՝ «Մարտիկներ հանուն արդարության» անվանումով խմբավորում ձեւավորելու մասին: Աղբյուրի փոխանցմամբ՝ այդ էջի միջոցով նաեւ Հայաստանի իրավապահների եւ պաշտոնատար անձանց նկատմամբ բռնություն գործադրելու, պայթյուններ, հրկիզումներ իրականացնելու եւ համընդհանուր վախի մթնոլորտ ձեւավորելու ուղղակի կոչեր են հրապարակվել: Դատարանի որոշմամբ կասկածյալի նկատմամբ որպես խափանման միջոց կալանավորում կիրառելու որոշում է կայացվել եւ հետախուզում հայտարարվել: Քանի որ մեղադրյալն ԱՄՆ քաղաքացի է եւ բնակվում է այդ երկրում, Հայաստանի իրավապահները նրա տվյալները փոխանցել են ամերիկացի գործընկերներին: Փորձում են պարզել եւ հայտնաբերել նաեւ Հայաստանում Ռ.Ք.-ի հանցակիցներին:

Վլադիմիր Պուտինն առաջադրվելու է 2018 թվականի մարտին կայանալիք Ռուսաստանի նախագահի ընտրություններում: Կրեմլի ղեկավարն այս մասին հայտարարել է այսօր կայացած ամենամյա ասուլիսում եւ հայտնել, որ ինքնառաջադրվելու է:

Ռուսաստանի գործող նախագահի ասուլիսին, ի դեպ, մասնակցել է նաեւ նախագահի պաշտոնում առաջադրելու մտադրության մասին հայտնած լրագրող Քսենիա Սոբչակը: Նա ռուսական իշխանություններին մեղադրել է ընտրություններին մասնակցության հարցում մրցակցություն չապահովելու մեջ: Որպես օրինակ բերել է Ալեքսեյ Նավալնիին, որին, Սոբչակի խոսքով, թույլ չեն տալիս մասնակցել ընտրություններին: Ի պատասխան՝ Պուտինը Նավալնիին համեմատել է Սահակաշվիլիի հետ: Միխայիլ Սահակաշվիլիի թեման այսքանով չի ավարտվել: Խոսելով Կիեւում Վրաստանի նախկին նախագահի գործունեության մասին՝ Վլադիմիր Պուտինն ասել է, որ դա իր մոտ խղճահարություն է առաջացնում Ուկրաինայի հանդեպ: 

ԱՄՆ նախագահ Դոնալդ Թրամփի «թեթեւ ձեռքով» Երուսաղեմը շարունակում է կռվախնձոր մնալ Իսրայելի եւ Պաղեստինի միջեւ: Հիշեցնենք, որ Թրամփը հայտարարել էր Երուսաղեմն Իսրայելի մայրաքաղաք ճանաչելու մասին եւ կարգադրել ամերիկյան դեսպանությունը տեղափոխել Թել Ավիվից: Այս որոշումը ողջունեց միայն Իսրայելի ղեկավարությունը: Թրամփի հայտարարությունից հետո Երուսաղեմը Պաղեստինի մայրաքաղաք ճանաչելու կոչեր հնչեցին: Իսլամական պետությունների ղեկավարները որոշել են հետեւել կոչին. Ստամբուլում կայացած Իսլամական համագործակցության կազմակերպության արտակարգ գագաթնաժողովի ժամանակ հայտարարվել է «Արեւելյան Երուսաղեմը որպես Պաղեստինի պետության մայրաքաղաք» ճանաչելու մասին: Բացի այդ՝ կազմակերպությունն առաջարկել է «բոլոր երկրներին ճանաչել Պաղեստին պետությունը եւ Արեւելյան Երուսաղեմը՝ որպես նրա օկուպացված մայրաքաղաք»:

Իսրայելին, սակայն, այս հայտարարությունն ամենեւին «չի տպավորել»: Ավելին, երկրի վարչապետը վստահ է, որ աշխարհի պետությունների մեծամասնությունը կհետեւի Թրամփի օրինակին եւ Երուսաղեմն Իսրայելի մայրաքաղաք կճանաչի: Բենիամին Նեթանյահուն նաեւ նշել է, որ պաղեստինցիներն ավելի մեծ հաջողության կհասնեն՝ ճանաչելով իրականությունը եւ գործելով խաղաղության, այլ ոչ թե ծայրահեղականության օգտին:

Դեկտեմբերի 14-ին դոլարը շարունակել է արժեզրկվել, իսկ եվրոն ու ֆունտը զգալի աճել են: Դոլարի փոխարժեքը կազմել է 482 դրամ, եվրոյինը՝ 570, ռուբլունը՝ 8 դրամ 24 լումա, ֆունտինը՝ 649 դրամ:

Դեկտեմբերի 15-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -4-6 աստիճան ցուրտ, ցերեկը՝ +6+8 աստիճան տաքություն: