Միավորված ազգերի կազմակերպության Մարդու իրավունքների գերագույն հանձնակատարի վարչությունը ցնցված է Իրաքում իրականացված մասսայական մահապատիժներից եւ կոչ է անում Բաղդադին մորատորիում հայտարարել մահապատժի իրականացման նկատմամբ: Այս մասին ճեպազրույցի ժամանակ հայտարարել է վարչության մամուլի խոսնակ Էլիզաբեթ Տրոսելը, հաղորդում է «ՌԻԱ Նովոստի»-ն:
«Մենք խորապես ցնցված ենք Իրաքում դեկտեմբերի 14-ին իրականացված 38 մարդու մասսայական մահապատժից: Մահապատժի կիրառումը երկրում մեծագույն մտահոգություն է առաջացնում»,- ասել է Տրոսելը: Նա հիշեցրել է, որ 38 կալանավոր դատապարտվել է մահապատժի ահաբեկչության հետ կապված հանցագործությունների համար:
Տրոսելի խոսքով՝ այս տարի ՄԱԿ-ի ներկայացուցիչները տեղեկացել են Իրաքում իրականացված 106 մահապատժի դեպքի մասին, այդ թվում նաեւ՝ 42 բանտարկյալի կախաղանի միջոցով մահապատժի:
«Մենք մեկ անգամ եւս կոչ ենք անում Իրաքի իշխանություններին դադարեցնել բոլոր մահապատիժները, անմիջապես մորատորիում հայտարարել մահապատժի իրականացման նկատմամբ, ինչպես նաեւ հրատապ եւ համապարփակ կերպով վերանայել քրեական արդարադատության համակարգը»,- նշել է Տրոսելը:
Հիշեցնենք, որ նախօրեին Իրաքի արդարադատության նախարարությունը հայտնել էր ահաբեկչության համար դատապարտված 38 կալանավորի նկատմամբ մահապատժի իրականացման մասին: Գերատեսչության փոխանցմամբ՝ մահապատիժները իրականացվել է հանրապետության ղեկավարության կողմից դատավճիռների հաստատումից հետո:
