Գերմանիայի Դաշնային Հանրապետության նախագահ Ֆրանկ-Վալտեր Շթայնմայերը կտրուկ դատապարտել է Բեռլինում Իսրայելի դրոշի այրումը եւ կոչ արել հանրությանը պայքարել Գերմանիայում հակասեմիտիզմի դեմ: «Հակասեմիտիզմը չպետք է տեղ ունենա ժամանակակից Գերմանիայում»,- ընդգծել է Շթայնմայերը` դեկտեմբերի 15-ին ելույթ ունենալով Բեռլինում Իսրայելի դեսպանատանը կազմակերպված Իսրայելի պետության հիմնադրման 70-ամյակին նվիրված ընդունելության ժամանակ, հաղորդում է DW-ը:
«Հակասեմիտիզմը չի հաղթահարվել, այդ թվում` մեր երկրում, եւ նա ցույց է տալիս իր նողկալի դեմքը տարբեր կերպարանքներում»,- ասել է նախագահը: Նրա խոսքով՝ հակասեմիտիզմը դրսեւորվում է ինչպես Իսրայելի դրոշի այրման մեջ, այնպես էլ «ատելության եւ բռնության կարգախոսների» եւ «հրեական ամեն ինչի դեմ նախապաշարմունքերի տարածման մեջ»:
ԱՄՆ նախագահ Դոնալդ Թրամփի՝ Երուսաղեմը որպես Իսրայելի մայրաքաղաք ճանաչելու վերաբերյալ որոշման դեմ դուրս եկած ցուցարարները դեկտեմբերի 11-ին այրել էին Իսրայելի դրոշը: «Գերմանական քաղաքի փողոցներում Իսրայելի դրոշի այրումը «սարսափեցրեց ինձ եւ նախ եւ առաջ ստիպեց ամաչել», - հայտարարել է Շթայնմայերը:
Քաղաքական գործիչը քննադատել է Թրամփի որոշումը, սակայն հավելել, որ դա չի կարելի համարել արդարացում ցուցարարների գործողությունների համար:
Նշենք, որ ավելի վաղ գերմանացի այլ քաղաքական գործիչներ նույնպես դատապարտել էին Իսրայելի դրոշի այրումը եւ պահանջել վճռական քայլեր ձեռնարկել խախտողների նկատմամբ:
