Ազատ տնտեսական գոտի բացելը նույնիսկ գործի կեսն էլ չի, դա պահանջում է ռեգուլյար աշխատանք: Այս մասին, այսօր՝ դեկտեմբերի 15-ին, Ագարակում ազատ տնտեսական գոտու բացման ժամանակ, լրագրողների հետ զրույցում նշել է ՀՀ վարչապետ Կարեն Կարապետյանը:
«Մեր մտադրություններն ու տրամադրությունը բավական լուրջ է, որովհետեւ մենք վստահ ենք, որ այն պայմանները, որ ստեղծվելու են Մեղրիի ազատ տնտեսական գոտում եւ այն հնարավորությունները, որ ունի մեր երկիրը, նկատի ունեմ տնտեսական ռեժիմները, որ մենք ունենք ԵՏՄ-ի հետ, Եվրամիության հետ, մեր հարեւան Իրանի հետ, այլ երկրների հետ, շատ լավ հարթակ է, որպեսզի բիզնեսը զարգանա»,-ընդգծեց նա:
Վարչապետի խոսքով, ազատ տնտեսական գոտում իրենք նախատեսում են ակտիվացնել Իրանի հետ սահմանային առեւտուրը, զբոսաշրջությունը, ակնկալում են, որ իրանցի գործընկերները տեղակայվեն այնտեղ, որ դուրս գան եւ Եվրամիության, եւ ԵՏՄ շուկաներ. «Ակնկալում ենք նաեւ, որ մեր գործընկերներից կգան եւ, նախնական պայմանավորվածություն ունենք, որ տեղակայվեն այստեղ, որ գնան Իրան աշխատեն: Ես վստահ եմ, որ ազատ տնտեսական գոտին ունի շատ-շատ լավ հեռանկարներ: Ազատ տնտեսական գոտի բացելը նույնիսկ գործի կեսն էլ չի, դա պահանջում է ռեգուլյար աշխատանք: Չնայած տրամադրությունը շատ բարձր է, որ այսօր հայտարարվում է ազատ տնտեսական գոտու ռեժիմը բացելու մասին: Այ իսկական աշատանքը հիմա է սկսվում»:
Կարեն Կարապետյանը նշեց, որ կատարված աշխատանքից չափազանց գոհ է «Գոհ եմ, որ սկսվեց: Հիմա էկնոմիկայի նախարարը եւ նրա թիմը լինելու են շատ հաճելի «պրիցելի» տակ»: