Հայաստանի Ազգային ժողովի գործունեությունը բացասական ազդեցություն է ունենում երկրում իրականացվող ներդրումների վրա: Այս մասին այսօր լրագրողների հետ հանդիպման ժամանակ ասել է տնտեսագետ, Հայ ազգային կոնգրեսի անդամ Վահագն խաչատրյանը:
Ըստ նրա՝ բարենպաստ պայմանների բացակայության դեպքում դեպի Հայաստան ներդրումների հոսք որեւէ տրամաբանությամբ չի կարող լինել. «Հայաստանում կա Ազգային ժողով, որը հինգ տարվա ընթացքում ֆանտաստիկ փոփոխություններ է կատարել օրենսդրության մեջ», - նշել է Վահագն Խաչատրյանը՝ միեւնույն ժամանակ հավելելով, որ փոփոխությունները կատարվել են անթույլատրելի հաճախականությամբ, եւ դրանք այնքան շատ էին, որ շատ հաճախ շվարեցնում էին գործարարներին եւ բիզնեսը:
Բացի այդ, ինչպես կարծում է տնտեսագետ ընդդիմադիրը, տարածաշրջանի աշխարհաքաղաքական իրավիճակը եւս ներդրումների հոսքի բացակայման պատճառ է, քանի որ երաշխիք չկա, որ այդ ներդրումները արդյունք կտան եւ որ ապագայում ներդրողները չեն կորցնի իրենց գումարները: