Ավագ քննիչ Միքայել Զադոյանի եւ փաստաբան Գայանե Գալոյանի մասնակցությամբ 3 հազար ԱՄՆ դոլար կաշառք պահանջելու եւ ստանալու գործից առանձնացված մասով նախաքննությունը շարունակվում է:
NEWS.am-ի տեղեկություններով, առանձնացված մասով մեղադրյալ՝ Էրեբունի և Նուբարաշեն վարչական շրջանների քննչական բաժնի պետի տեղակալ Բունիաթ Եղիազարյանի մասնակցությամբ առաջիկայում քննչական գործողություններ պետք է արվեն: Մեր տեղեկություններով, Բունիաթ Եղիազարյանին նույնպես առաջադրված է այն մեղադրանքը, ինչ Միքայել Զադոյանին՝ ՔՕ 311-րդ հոդվածի 4-րդ մասի 2-րդ կետով, այն է՝ կաշառք ստանալը, որը կատարվել է առանձապես խոշոր չափերով: Նշենք, որ Եղիազարյանը ստորագրությամբ ազատ է արձակվել, նրա գործունեությունն այս պահին դադարեցված է: Զադոյանն ու Եղիազարյանը մտերիմ ընկերներ են, ըստ նախաքննության նյութերի, գործել են միասին:
Հիշեցնենք, որ Գայանե Գալոյանի եւ Միքայել Զադոյանի մասնակցությամբ կաշառք պահանջելու եւ ստանալու գործն արդեն դատարանում է: Այն քննվելու է Էրեբունի եւ Նուբարաշեն վարչական շրջանների ընդհանուր իրավասության դատարանում, դատավորը Մեսրոպ Մակյանն է: Ըստ մեղադրական եզրակացության՝ Բաբկեն Գասպարյանը որդու օգտին իրենց լիազորությունների շրջանակում գործողություններ կատարելու դիմաց, Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանին և բաժնի պետի տեղակալ Բունիաթ Եղիազարյանին փաստաբան Գայանե Գալոյանի օժանդակությամբ և միջոցով տվել է առանձնապես խոշոր չափերով կաշառք: Գայանե Գալոյանը մեղադրվում է կաշառք ստանալուն օժանդակելու մեջ, իսկ Միքայել Զադոյանն էլ Գայանե Գալոյանի օժանդակությամբ և միջոցով Բաբկեն Գասպարյանից առանձնապես խոշոր չափերով կաշառք ստանալու մեջ
Բաբկեն Գասպարյանին մեղադրանք է առաջադրվել Քրեական օրենսգրքի 312-րդ հոդվածի 3-րդ մասի 1-ին կետով, Գայանե Գալոյանին՝ ՔՕ 38-311-րդ հոդվածի 4-րդ մասի 2-րդ կետով, իսկ Միքայել Զադոյանին՝ ՔՕ 311-րդ հոդվածի 4-րդ մասի 2-րդ կետով: Բաբկեն Գասպարյանը ստորագրությամբ ազատ է արձակվել, իսկ մյուս երկուսը կալանքի տակ են: