ՀՀ Տնտեսական մրցակցության պաշտպանության պետական հանձնաժողովը շարունակում է մարզային այցելությունները՝ մարզերում գործունեություն իրականացնող գործարարների հնարավոր մրցակցային խնդիրներին տեղում ծանոթանալու եւ դաշտի առավել բարելավմանն ուղղված վերջիններիս առաջարկներին եւ ծրագրերին ծանոթանալու նպատակով:
Հանդիպմանը ներկա էին Վայոց ձորի մարզում գործունեություն իրականացնող մոտ 2 տասնյակ գործարարներ, որոնք զբաղվում են հիմնականում գինու, կոնյակի, կաթնամթերքի, չրեղենի, հրուշակեղենի արտադրությամբ, ինչպես նաեւ գործում են զբոսաշրջության, մանրածախ առեւտրի եւ հյուրանոցային ծառայությունների ոլորտում:
ՀՀ Մրցակցային մարմնի ղեկավարը նշեց, որ Հանձնաժողովը մարզային կառույցներ չունի, այդ իսկ պատճառով տարվա ընթացքում կազմակերպվում են նման հանդիպումներ, որոնց ընթացքում ինչպես փորձը ցույց է տալիս վերհանվում են մի շարք մրցակցային խնդիրներ. «Մեր նպատակն է, որպեսզի ձեզանից յուրաքանչյուրը զգա տարեցտարի բարելավվող մրցակցային միջավայրի ազդեցությունը՝ իր բիզնես գործունեության վրա, որն անշուշտ կբերի ծավալների, ինչպես նաեւ արտահանման աշխարհագրության ընդլայնմանը: »:
ՀՀ Վայոց ձորի մարզպետ Հարություն Սարգսյանը ընդգծեց նման հանդիպումների կարեւորությունը՝ նշելով, որ այն առավել կսերտացնի մարզում գործող տնտեսվարողների հետ համագործակցությունը, ինչն էլ հնարավորություն կտա առավել արագ հասնելու առկա եւ հնարավոր խնդիրների լուծմանը:
Գինեգործությամբ զբաղվող մի քանի ընկերություններ ՀՀ մրցակցային մարմնի ղեկավարին տեղեկացրեցին, որ երբեմն խնդիրներ են առաջանում որոշ առեւտրային ցանցերի հետ, որոնք բացի այն, որ հաճախ ուշացնում են մատակարարվող ապրանքի դիմաց վճարումները, երբեմն էլ կիրառում են տարբերակված մոտեցումներ, ինչը խոչընդոտում է դաշտում հավասար պայմաններով աշխատելուն: Բացի այդ, երբեմն կիրառվում են տարբերակված մուտքային վճարներ, ինչը խնդիրներ է ստեղծում հատկապես նոր շուկա մուտք գործող ընկերությունների համար:
Զբոսաշրջությամբ զբաղվող «Վայքի տուրիզմի կենտրոն» ընկերության տնօրեն Ռուզան Ղազարյանը տեղեկացրեց , որ կան որոշ ընկերություններ, որոնք այնքան էլ բարեխիղճ կերպով չեն կատարում պետության հանդեպ իրենց պարտավորությունները եւ մրցակցային առավելություն են ստանում դաշտում աշխատող այն ընկերությունների հանդեպ, որոնք գործում են օրենքի դաշտում եւ բարեխիղճ:
Հանդիպմանը ներկա տնտեսվարողները անդրադարձան նաեւ գինեգործության, խաղողագործության, որոշակի ապրանքանիշերի անբարեխիղճ գովազդի խնդիրներին:
Ի պատասխան տնտեսվարողների հարցերին ՏՄՊՊՀ նախագահ Արտակ Շաբոյանն ասաց, որ անշուշտ, ցանկացած պարագայում տնտեսվարողների գործունեության պայմանները պետք է լինեն հավասար եւ բացառվեն խտրական մոտեցումները. «Մեր գործունեությունը հենց միտված է դրան, որպեսզի բոլորն ունենան նույն մրցակցային հնարավորությունները: Մեր աշխատանքի ընթացքում մեծ ուշադրություն ենք դարձրել նաեւ պետական տարբեր մարմինների գործունեությանը՝ պետական գնումների շրջանակում, որպեսզի բոլոր տնտեսվարողների հանդեպ կիրառվող մոտեցումները լինեն համահավասար: Եւ, ի ուրախություն մեզ, պետք է փաստեմ, որ այս առումով իսկապես հասել ենք լուրջ հաջողությունների»: Ա Շաբոյանը հորդորեց նաեւ բարձրացված հարցերի վերաբերյալ դիմումներ ներկայացնել Հանձնաժողովին, որպեսզի խնդիրները ուսումնասիրվեն առարկայական եւ դրանց լուծումներ տրվեն:
