2017թ. 11 ամիսներին ՌԴ մուտքի արգելքի պատճառով Հայաստանից Ռուսաստան մեկնել չկարողացող քաղաքացիներից 321-ը դիմել են Հայաստանի պետական միգրացիոն ծառայությանը՝ խնդրանքով, որ արգելքը հանվելու համար դիմում ներկայացվի ռուսական կողմին:
Ստացված բոլոր դիմումներն էլ ուղարկվել են ռուսական կողմին, դրական պատասխան է ստացել ընդամենը 39 դիմում, 113-ի դեպքում մուտքի արգելքի մասին որոշումը մնացել է անփոփոխ: Նշենք, որ տարեցտարի ՀՀ Միգրացիոն պետական ծառայություն ստացվող դիմումների թիվը նվազում է: Այսպես, 2014թ. երկրորդ կիսամյակին նման դիմում էր ներկայացրել 3 հազար 7 հարյուր 20 քաղաքացի, 2015թ.-ին՝ 7 հազար 8 հարյուր 43, իսկ արդեն 2016թ.-ին՝ 1365: Ստացվում է՝ վերջին երեք տարին արգելքը վերացնելու խնդրանքով ՄՊԾ է դիմել Հայաստանի 13 հազար 249 քաղաքացի: Ստացված դիմումներից ռուսական կողմը բավարարել է 5 հազար 142-ը:
Հիշեցնենք, որ Ռուսաստանի միգրացիոն օրենսդրության եւ կիրառվող պրակտիկայում վերջին տեղի ունեցած խստացումների արդյունքում բազմաթիվ օտարերկրյա քաղաքացիների նկատմամբ սկսել է կիրառվել ՌԴ մուտքի արգելանք` մինչեւ 10 տարի ժամկետով: Ռուսական աղբյուրների համաձայն Հայաստանից մոտավորապես 50-60 հազար ՀՀ քաղաքացիներ չեն կարողանում հետ վերադառնալ Ռուսաստանի Դաշնություն:
Այդ անձանց խնդիրներին լուծում տալու նպատակով համաձայնություն է ձեռք բերվել ՀՀ ԱԻՆ Միգրացիոն պետական ծառայության եւ Ռուսաստանի դաշնային միգրացիոն ծառայության միջեւ, համաձայն որի ՌԴ մուտքի արգելքը բացելու վերաբերյալ ՀՀ քաղաքացիների դիմումները` կից փաստաթղթերի հետ միասին հավաքվում եւ փոխանցվում են ռուսական կողմին:
Ի դեպ, 2016թ. մարտի տվյալների՝ ՀՀ 30 հազար քաղաքացիներ ունեն ՌԴ մուտքի արգելք:
