ԱՄՆ նախագահ Դոնալդ Թրամփը հույս ունի, որ հարկային բարեփոխման շնորհիվ, որը Կոնգրեսում ընդունման վերջին փուլում է, կարագացնի տնտեսական աճը եւ երկիր կվերադարձնի ընկերությունների կողմից արտասահմանում ներդրված դրամական միջոցները, հաղորդում է «ՌԻԱ նովոստին»։

«Չորս տրիլիոն դոլար կվերադառնա երկիր։ Սրանք այն փողերն են, որոնք երկար տարիներ «լռվել են»  արտասահմանում»,-հայտարարել է Թրամփը լրագրողների հետ ճեպազրույցի ժամանակ։

«Տնտեսությունն արդեն հասել է 3 տոկոս տնտեսական աճի։ Ոչ ոք չէր մտածում, որ դա հնարավոր է։ Ես կարծում եմ, որ մենք կարող ենք այդ ցուցանիշը հասցնել մինչեւ 4,5, անգամ 6 տոկոսի։ Յուրաքանչյուր տոկոսային կետ 2,5 տրլն դոլար է։ Մենք վերադարձել ենք խաղի մեջ եւ շուտով իսկապես կդառնանք լավագույնը»,-հայտարարել է երկրի նախագահը։

Կոնգրեսում հանրապետականները մտադիր են հաջորդ շաբաթ ընդունել հարկային բարեփոխումները, որով նախատեսվում է կտրուկ նվազեցնել բիզնեսից հարկահավաքությունը եւ սահմանափակ հարկային արտոնություններ տալ ֆիզիկական անձանց կատեգորիաների մեծ մասին։ Եթե օրենքն ընդունվի, այն կլինի ԱՄՆ հարկային համակարգում ամենախոշոր փոփոխությունը վերջին 300 տարում։