Իսրայելի վարչապետ Բենիամին Նեթանյահուն կհրավիրի նախարարների հավաք եւ կհանդիպի Teva Pharmaceutical իսրայելական դեղագործական ընկերության գլխավոր տնօրենի հետ՝ վերակազմակերպման ծրագրի շրջանակներում աշխատակիցների ազատման շուրջ ստեղծված ճգնաժամի հաղթահարման համար, հաղորդում է «ՌԻԱ Նովոստի»-ն։
Teva Pharmaceutical իսրայելական դեղագործական ընկերությունը ներկայացրել է երկու տարվա վերակազմակերպման ծրագիր, որը նախատեսում է աշխատակիցների ավելի քան քառորդ մասի ազատում՝ շուրջ 14.000 մարդ ամբողջ աշխարհից: Տեղական լրաատվամիջոցների տվյալներով՝ խոսքը վեց հազար աշխատատեղերից մոտ 3 հազարի կրճատման մասին է:
«Այս շաբաթ ֆինանսների եւ էկոնոմիկայի նախարարի հետ միասին կհանդիպեմ Teva-ի գլխավոր տնօրենի հետ»,-ասել է Նեթանյահուն կառավարության նիստի բացման ժամանակ: Նեթանյահուն հավելել է, որ անցած շաբաթ նա արդեն խոսել է Teva-ի գլխավոր տնօրենի հետ:
«Անցյալ շաբաթ ես խոսեցի նրա հետ եւ ասացի, որ մեր հիմնական խնդիրն է նվազագույնի հասցնել աշխատակիցներին պատճառվող վնասը: Սա առաջին: Երկրորդ՝ Երուսաղեմի գործարանի եւ ձեռնարկությունների փակումը կանխելու համար: Եվ երրորդ՝ պետք է անել այնպես, որ Teva-ն մնա Իսրայելում: Այստեղ հազարավոր աշխատողներ կան, այն ստեղծվել է որպես իսրայելական ընկերություն, եւ մենք ուզում ենք, որ այն շարունակի այդպիսին մնալ: Մենք կօգտագործենք մեզ հասանելի տարբեր միջոցներ այս խնդրի լուծման համար»,-եզրափակել է Նեթանյահուն: