Վրաստանի նախկին նախագահ, «Նոր ուժերի շարժում» կուսակցության ղեկավար Միխայիլ Սաակաշվիլին, ով նախօրեին փորձել էր Մայդանում բեմահարթակ տեղադրել, վեճի է բռնվել ոստիկանության Շեւչենկոյի բաժնի պետ Գերման Պրիստուպայի հետ, քանի որ վերջինս նրան թույլ չէր տվել դա իրականացնել, հաղորդում է ՈՒՆԻԱՆ-ը։

Վեճի տեսանյութը քաղաքական գործիչը հրապարակել է իր ֆեյբուքյան էջում։ Սաակաշվիլին իր կողմնակիցների հետ դեկտեմբերի 17-ի գիշերը փակել էր Կիեւի կենտրոնում՝ վրանային ճամբարի մոտ գտնվող ճանապարհը: Նրանք բախվել էին ոստիկանության հետ, եւ Սաակաշվիլին սկսել է պնդել, որ Պրիստուպան հարբած է: Նա իր հերթին հայտարարել է, որ Սաակաշվիլին գտնվում է թմրամիջոցների ազդեցության տակ, ինչը Սաակաշվիլիին ավելի է բարկացրել։

«Ահա իշխանության դեմքը։ Հարբած դոնեցկյան ոստիկանը հատկանշական Պրիստուպա ազգանվամբ, Գորլովկայի նախկին ոստիկանապետը, ում չգիտես ինչու նշանակել են Կիեւի Շեւչենկոյի շրջանի ոստիկանապետ, փորձել է խանգարել մեզ բեմահարթակ դնել Կրեշատիկում։  Ավելին,  մոսկովյան քարոզչության լավագույն ավանդույթներին հավատարիմ՝ ինձ թմրամոլ է անվանել։ Հե՛յ, դու՛ք Բանկովյան փողոցում, դոնեցկյան «մենթից» բացի ուրիշ ոչ մեկին չգտաք ձեր նպատակների համար»,-գրել է նա։

Նշենք, որ Պրիստուպայի գործընկերները հանդես են եկել ոստիկանի պաշտպանությամբ: Այսպես, Կիեւի ազգային ոստիկանության ղեկավար Անդրեյ   Կրիշենկոն, պատգամավոր Անտոն Գերաշենկոն, ներքին գործերի նախարարի խորհրդական Զորյան Շկիրյակը իրենց աջակցությունն են հայտնել Պրիստուպային։