Վրաստանի նախկին նախագահ, «Նոր ուժերի շարժում» կուսակցության առաջնորդ Միխայիլ Սաակաշվիլին հայտարարել է, որ կհասնի ուկրաինացի բոլոր կոռումպացված իրավապահների եւ «բարիգների» հաշիվների սառեցմանը: Քաղաքական գործիչը այս մասին ասել է դեկտեմբերի 17-ին Կիեւում կայացած «Իմպիչմենտի համար» երթի ընթացքում, հաղորդում է «ԳՈՐԴՈՆ»-ը:
Սաակաշվիլիի խոսքով՝ երկրում Ուկրաինայի ազգային գվարդիա չկա, սակայն կա «կարդինալի անձնական պահապանների խումբ», որը պատրաստ է «առեւանգել մարդկանց փողոցից» եւ «ամեն տեսակ կեղտոտ պատվերներ կատարել»:
Նա նաեւ ասել է, որ գիշերը Գորլովկայի ոստիկանության նախկին պետը հարբած վիճակում փորձել է խանգարել բեմահարթակ տեղադրել Կիեւի կենտրոնում:
«Դիմակները պատռվել են, քանի որ արեւմտյան մամուլը երբեք այսքան բաց չի գրել «բարիգների» կոռուպցիայի եւ անօրինականության մասին: Դիմակներ պատռվել են, եւ դա լավ է, քանի որ Արեւմուտքը սկսել է տարբերել Ուկրաինայի ժողովրդին «բարիգներից», ճանճերին՝ կոտլետներից ...Այնտեղ, որտեղ կանգնած է ժողովուրդը, կլինի Արեւմուտքւ աջակցությունը, ես դրանում լիովին համոզված եմ...Ես կհասնեմ նրանց հաշիվների սառեցմանը, կհասնեմ նրան, որ նրանց ձեռքերը ոչ ոք չի սեղմի, կհասնեմ նրան, որ անգամ եթե նրանք փախչեն Եվրոպա եւ Ամերիկա, Հետաքննությունների դաշնային բյուրոն, եվրոպական ոստիկանական բոլոր ծառայությունները հատ-հատ կորսան նրանց եւ կհանձնեն Ուկրաինայի ժողովրդի արդար դատին», - ասել է Սաակաշվիլին.
Հիշեցնենք, որ Սաակաշվիլին նոյեմբերի 12-ին առաջարկել էր դեկտեմբերի 3-ից սկսել Ուկրաինայի նախագահ Պյոտր Պորոշենկոյի «ժողովրդական իմպիչմենտի» գործընթացը: Նրա քաղաքական թիմը «Իմպիչմենտի համար» կարգախոսով արդեն մի քանի երթ է անցկացրել:
