«Իսլամական պետություն» ահաբեկչական խմբավորումը ստանձնել է Պակիստանի Քվեթա քաղաքի (Բալուջիստանի նահանգ) եկեղեցու վրա հարձակման պատասխանատվությունը: Այս մասին հայտնում է «ՏԱՍՍ»-ը՝ վկայակոչելով Reuters գործակալությունը:
Ավելի վաղ Dawn թերթը հաղորդել էր, որ առնվազն երկու մահապարտ ահաբեկիչ կիրակնօրյա պատարագի ժամանակ հարձակում են գործել եկեղեցու վրա: Ըստ տեղական իշխանությունների՝ շենքում հարձակման պահին կար մոտ 400 մարդ: Ինչպես նշել են ականատեսները, զինյալները աննկատ ներս անցնելու անհաջող փորձից հետո մուտք են գործել եկեղեցու շենք անվտանգության աշխատակցի հետ միասին: Անվտանգության ուժերը կրակ են բացել հարձակվողների վրա:
Կրակոցներից վիրավորված ահաբեկիչներից մեկը ինքնասպան է եղել՝ գործի դնելով մահապարտի գոտին: Մյուս զինյալը ոչնչացվել է անվտանգության ուժերի կողմից: Վերջին տեղեկությունների համաձայն` միջադեպի հետեւանքով 9 մարդ է զոհվել, եւս 30-ը վիրավորվել են:
