Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլիի կողմնակիցները որոշել են շարունակել բողոքի ակցիան Գերագույն Ռադայի մոտ վրանային ավանի տարածքում այն բանից հետո, երբ Հոկտեմբերյան պալատը գրավելու անհաջող փորձ են արել։ Ռադայի մոտ վերադառնալու կոչով ցուցարարներին դիմել է ինքը՝ Սաակաշվիլին։
«Գնում ենք Ռադայի մոտ շարունակելու մեր խաղաղ պիկետը։ Ո՞վ է ինձ հետ գալիս»,-ասել է նա, ինչին ներկաները հավանություն են տվել։ Սաակաշվիլին իր կողմնակիցների հետ փորձել է ներխուժել Հոկտեմբերյան պալատի շենք, որտեղ, նրա խոսքով, նախատեսում էին բողոքի ակցիաները համակարգող շտաբ ձեւավորել։
Ցույցի վայրից ուղիղ հեռարձակում էր իրականացվում Սաակաշվիլիի Facebook-ի էջում։ Ազգային գվարդիայի աշխատակիցները փակել են պալատի մուտքերը եւ շղթա կազմել շենքի շուրջը։
Ուկրաինայի ՆԳՆ ներկայացուցիչ Արտյոմ Շեւշենկոն հայտնել է, որ շենքում ներկայումս ներկայացում է ընթանում երեխաների համար եւ խնդրել է ցուցարարներին սադրիչ քայլերի չգնալ։
Սաակաշվիլին իր կողմնակիցներին կոչ է արել չտրվել սադրանքներին եւ չգրոհել շենքը։