Բագրատաշենի անցակետում նոյեմբերի 19-ին ԱԱԾ սահմանապահ զորքերի ծառայողների եւ քաղաքացիների միջեւ տեղի ունեցած միջադեպի առթիվ հարուցված քրեական գործով մեղադրյալ Կարեն Շիրվանյանին ծեծելու դեպքով դեռեւս քրեական գործ չկա հարուցված: Այս մասին NEWS.am-ին ասաց Շիրվանյանի պաշտպան Գուրգեն Հարությունյանը:
Պաշտպանը միջնորդություն էր ներկայացրել, որ Կարեն Շիրվանյանին ԱԱԾ սահմանապահների կողմից ծեծելու դեպքով քրեական գործ հարուցվի ու քննություն կատարվի:
«Մինչեւ օրս մեր միջնորդության վերաբերյալ քննիչը որոշում չի կայացրել: Չենք հասկանում, բայց գործը ձգձգվում է, դեռեւս առերեսումներ էլ տեղի չեն ունեցել իմ պաշտպանյալի մասնակցությամբ»,- ասաց Գուրգեն Հարությունյանը:
Նա հայտնեց, որ գործը տեղափոխվել է Քննչական կոմիտեի հատկապես կարեւոր գործերով վարչություն: Նշենք, որ այս գործով միակ մեղադրյալ Կարեն Շիրվանյանն է, միջադեպին մասնակցել են նաեւ Շիրվանյանի փեսան եւ վերջինիս եղբայրը, որոնք որեւէ կարգավիճակ չունեն, սակայն տեղեկություններ կան, որ իրավապահները նրանց որոնում են:
«Կարեն Շիրվանյանին մեղադրանք է առաջադրվել ՀՀ Քրեական օրենսգրքի 316-րդ հոդվածի 2-րդ մասի հատկանիշներով՝ իշխանության ներկայացուցչի նկատմամբ բռնություն գործադրելը, սակայն, մենք այդ մեղադրանքի հետ համաձայն չենք: Կարենին զանգել, ասել են, որ աներորդուն՝ Արթուր Կիրակոսյանին, ծեծում են սահմանապահները, ինքն էլ գնացել է այնտեղ, տեսել՝ մեկն արյունոտ ընկած է, քաշքշուկ է... Կարենը փորձել է պարզաբանում ստանալ, բայց հենց նրա նկատմամբ բռնություն է կիրառվել, նրան ծեծել են: Հետեւաբար, առաջադրված մեղադրանքը սխալ է, անձնական բնույթի վեճ է եղել, Կարենը գնացել է աներորդուն պաշտպանելու»,- ավելի վաղ մեզ հետ զրույցում դեպքի մանրամասներն էր ներկայացրել Գուրգեն Հարությունյանը:
Նշենք, որ ըստ Քննչական կոմիտեի ավելի վաղ տարածած հաղորդագրության՝ նախնական տվյալներով՝ 2017թ. նոյեմբերի 19-ին՝ ժամը 23:00-ի սահմաններում, Բագրատաշենի սահմանային անցակետում ԱԱԾ սահմանապահ զորքերի ծառայողների կողմից ստուգման նպատակով կանգնեցվել է «Մերսեդես Բենց» մակնիշի ավտոմեքենան, որի վարորդը վիճաբանել է ՍԶ ծառայողների հետ։ Վիճաբանությանը միացել է մեկ այլ քաղաքացի և իր մոտ գտնվող դանակով հարվածել ծառայողական պարտականությունները կատարող սահմանապահ զորքերի ծառայողին։
Դեպքի առթիվ հարուցվել է քրեական գործ՝ ՀՀ քրեական օրենսգրքի 316-րդ հոդվածի 2-րդ մասի հատկանիշներով: ՀՀ ԱԱԾ ծառայողը ճանաչվել է տուժող, որը բժշկական օգնություն ստանալուց հետո դուրս է գրվել։
Ձեռնարկված քննչական և օպերատիվ-հետախուզական գործողությունների արդյունքում պարզվել են դեպքի էական նշանակություն ունեցող մի շարք հանգամանքներ, վիճաբանությանը մասնակցած քաղաքացիների ինքնությունը, ովքեր Տավուշի մարզի բնակիչներ են։ Կարեն Շիրվանյանը կալանավորված է:
