Վայք-Եղեգնաձոր ավտոճանապարհին հուլիսի 1-ին 2 մարդու կյանք խլած ողբերգական վթարի գործով տուժող կողմը հետ է վերցրել քաղաքացիական հայցը: Այս մասին NEWS.am-ին ասաց գործով ամբաստանյալ, վարորդ Վիգեն Սեխլեյանի պաշտպան Կարեն Քալանթարյանը՝ նշելով, որ տուժողներն ու տուժողների իրավահաջորդները շուրջ 8 մլն դրամ էին պահանջում իր պաշտպանյալից:
«Դեկտեմբերի 12-ին նշանակված դատական նիստին իմ պաշտպանյալը հայտարարեց, որ ընդունում է իրեն առաջադրված մեղադրանքն ու միջնորդեց դատաքննությունն անցկացնել արագացված կարգով, սակայն, դաաավարության մասնակիցներն առարկեցին, դատարանն էլ մերժեց միջնորդությունը: Դատաքննությունն արեցինք մեկ նիստով եւ հունվարի 11-ին արդեն մեղադրողը ճառ կասի»,- ասաց Կարեն Քալանթարյանը:
Նշենք, որ նախաքննությամբ պարզվել է, որ «Nissan» մակնիշի ավտոմեքենայի վարորդ Վիգեն Սեխլեյանը սթափ վիճակում, մոտ 70-80 կմ/ժ արագությամբ Երեւան-Մեղրի միջպետական ավտոճանապարհին, առանց նախապես համոզվելու վազանցի կատարման անվտանգության մեջ, դուրս է եկել վազանցի ու ավտոմեքենան դուրս է բերել հանդիպակաց ուղեմաս եւ բախվել հանդիպակաց ուղղությամբ ընթացող մեքենային: Վթարի հետեւանքով այդ մեքենայի ուղեւորներ, հարո ու սկեսուր մահացել են:
Ավելի վաղ հայտնել էինք, որ 2017թ.-ին հուլիսի 1-ին ժամը 07:33-ին Վայք-Եղեգնաձոր ավտոճանապարհին՝ Վայոց ձորի մարզի Մալիշկա գյուղի մոտակայքում տեղի էր ունեցել ավտովթար: Վթարի հետեւանքով 2 ուղեւոր մահացել էր, եւս 11-ը ստացել էին մարմնական վնասվածքներ: Վիրավորներ մեջ կային նաեւ Իրանի քաղաքացիներ:
Գործով մեղադրյալ Վիգեն Սեխլեյանը ստորագրությամբ ազատ է արձակվել: