Ժամկետային զինծառայող որդուն ծառայությունից ազատելու համար կաշառք տալու համար 2 տարվա պայմանական ազատազրկման դատապարտված Արգամ Սիմոնյանը Վերաքննիչ բողոք է ներկայացրել:
Արգամ Սիմոնյանն ու իր պաշտպանը պահանջում են արդարացում՝ հանցակազմի բացակայության պատճառաբանությամբ:
Հիշեցնենք, որ ըստ մեղադրանքի, ժամկետային զինծառայող Խաչիկ Խաչատրյանին ծառայությունից ազատելու համար նրա ծնողները 1100 ԱՄՆ դոլար են տվել Երեւանի քաղաքացի Սաթենիկ Սարգսյանին, որն էլ այն Երվանդ Կարապետյանի միջոցով փոխանցել է հոսպիտալի բժիշկ Աշոտ Սիմոնյանին:
Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը վճռել է Երվանդ Կարապետյանին դատապարտել 1 տարվա ազատազրկման՝ պատիժը պայմանականորեն չկիրառելով եւ նշանակելով փորձաշրջան 1 տարի ժամկետով, հոսպիտալի բժիշկ Աշոտ Սիմոնյանին՝ տուգանել 1 մլն դրամով, ժամկետային զինծառայող Խաչիկ Խաչատրյանի ծնողներին՝ Կարինե Խաչատրյանին եւ Արգամ Սիմոնյանին, 2 տարվա պայմանական ազատազրկման: Սաթիկ Սարգսյանին դատարանը վճռել է տուգանել 200 հազար դրամով:
Այս գործով բոլոր ամբաստանյալները, բացի Աշոտ Սիմոնյանից, ընդունել էին իրենց առաջադրված մեղադրանքները: