ՆԱՏՕ-ն հույս ունի նոր ազդակ տեսնել ղարաբաղյան կարգավորման գործընթացում, քանի որ հակամարտության կարգավորումը շահավետ կլինի ամբողջ տարածաշրջանի համար։ Այս մասին, այսօր՝ դեկտեմբերի 18-ին, Երեւանի պետական համալսարանում ուսանողների հետ հանդիպման ժամանակ հայտարարեց Գլխավոր քարտուղարի տեղակալ Ռոուզ Գետեմյուլերը։
«ՆԱՏՕ-ի անունից ես պետք է ասեմ, որ մենք շատ ուրախ ենք տեսնել բարձր մակարդակով վերջին դիվանագիտական ջանքերը եւ հուսով ենք, որ շուտով հնարավոր կլինի հասնել խնդրի կարգավորման»,- ասաց նա:
Գետեմյուլերը նշեց, որ ինքն աշխատել է Քլինթոնի օրոք 90-ականներին եւ հիշում է ճգնաժամի առաջին օրերը։ «Ես ցավում եմ, որ անցել է շուրջ 25 տարի, իսկ հակամարտությունը մնում է չլուծված։ Հայաստանի եւ Ադրբեջանի համար շատ կարեւոր է միասին աշխատելը: Ես ուրախ եմ, որ երկու շաբաթ առաջ արտգործնախարարները հանդիպել են Վիեննայում՝ ԵԱՀԿ ԱԳ նախարարների խորհրդի շրջանակներում, իսկ նախագահները հանդիպել են հոկտեմբերին»,-նշեց ՆԱՏՕ-ի ներկայացուցիչը` հավելելով, որ շատ ուրախ է, որ ԱՄՆ-ն այս մակարդակով մասնակցում է խաղաղ կարգավորման գործընթացին: