Հայկական կողմի դիրքորոշումը հայ-թուրքական հարաբերությունների կարգավորման հարցում միշտ կառուցողական է եղել։ Այս մասին NEWS.am-ի թղթակցի հետ զրույցում հայտարարել է ԱԺ ՀՅԴ խմբակցության քարտուղար Աղվան Վարդանյանը՝ պատասխանելով այն հարցին, թե կարող են արդյոք հայ-թուրքական հարաբերությունների կարգավորման հարցում տեղաշարժի դրական նախադրյալներ ստեղծվել, եթե հաշվի առնենք այն հանգամանքը, որ Թուրքիան վերջնականապես հեռանում է ժողովրդավարության սկզբունքներից եւ դառնում ավելի բռնապետական պետություն։
Նրա խոսքով՝ Երեւանը մշտապես հայտարարել է, որ այս հարաբերությունները ամբողջապես կարելի է կարգավորել, եթե նախապայմաններ չդրվեն եւ դիվանագիատական հարաբերություններ հաստատվեն երկու երկների միջեւ։ «Սակայն ակնհայտ է, որ Թուրքիան փորձում է ցանկացած գնով Հայաստանի հետ խոսել նախապայմանների լեզվով եւ երկու երկրների հարաբերությունների հարցը կապել երրորդ կողմի շահերի հետ՝ ի դեմս Ադրբեջանի»,- նշել է Վարդանյանը՝ հավելելով, որ Անկարան ամեն կերպ փորձում է Հայաստանին դուրս թողնել տարածաշրջանային նախագծերից, իսկ այդ ֆոնին, իհարկե, հարաբերությունները երկու երկրների միջեւ չեն կարգավորվի։
Պատասխանելով այն հարցին, թե Դաշնակցությունը կշարունակի պնդել հայ-թուրքական արձանագրությունների տակ դրված Երեւանի ստորագրության հետկանչման հարցի շուրջ, խորհրդարանական խմբակցության քարտուղարը նշել է, որ կուսակցությունը փաստաթղթի ստորագրման առաջին իսկ օրվանից նշել է, որ դրանք որեւէ ապագա չունեն։ «Արձանագրությունները մեռելածին էին, վերակենդանացնել դրանք անհնար է»,- եզրափակել է Աղվան Վարդանյանը։
Հիշեցնենք, որ Հայաստանն ու Թուրքիան չունեն դիվանագիտական հարաբերություններ, իսկ հայ-թուրքական սահմանը փակվել է 1993 թվականին թուրքական կողմի նախաձեռնությամբ։ Երկու երկրների հարաբերությունների նորմալացման գործընթացը նախաձեռնվել է 2008 թվականի աշնանը Հայաստանի նախագահ Սերժ Սարգսյանի կոմից։ 2009 թվականի հոկտեմբերի 10-ին երկու երկրների արտաքին գործերի նախարարները Ցյուրիխում ստորագրել էին «Հայաստանի Հանրապետության եւ Թուրքիայի Հանրապետության միջեւ դիվանագիտական հարաբերություններ հաստատելու մասին» եւ «Հայաստանի Հանրապետության եւ Թուրքիայի Հանրապետության միջեւ հարաբերությունների զարգացման մասին» արձանագրությունները։ Սակայն ավելի ուշ Անկարան առաջ է քաշել ղարաբաղյան հակամարտության հետ կապված նախապայմաններ, որը բերել է հայ-թուրքական հարաբերությունների նորմալացման գործընթացի փաստացի տապալմանը։ Արձանագրությունների վավերացման հարցը սառեցված է։
