Հայաստանը եւ ՆԱՏՕ-ն համագործակցում են արդեն 25 տարի: Եվ այդ համագործակցությունը բխում է փոխադարձ շահերից: Այս մասին հայտարարել է ՆԱՏՕ-ի գլխավոր քարտուղարի տեղակալ Ռոուզ Գյոթեմյուլլերը Հայաստանի արտգործնախարար Էդվարդ Նալբանդյանի հետ հանդիպումից հետո կայացած ճեպազրույցի ժամանակ: Նշենք, որ ՆԱՏՕ-ի գլխավոր քարտուղարի տեղակալը Հայաստանում է գտնվում ՆԱՏՕ-ի շաբաթվա շրջանակներում:
Ըստ Ռոզե Գյոթեմյուլլերի՝ հանդիպման ընթացքում քննարկվել են հարաբերությունների ընդլայնման մարտահրավերները եւ հեռանկարները: «Անհատական գործընկերության նոր ծրագիր է հաստատվել: Շուտով նաեւ կգործարկվի վստահության հիմնադրամը»,- նշել է ՆԱՏՕ-ի գլխավոր քարտուղարի տեղակալը:
Վերջինիս խոսքով՝ ՆԱՏՕ-ն երախտապարտ է Հայաստանին Աֆղանստանում եւ Կոսովոյում խաղաղապահ առաքելություններին մասնակցության համար: Ռոուզ Գյոթեմյուլլերը նաեւ շնորհակալություն է հայտնել ՀՀ ԱԳՆ ղեկավարին ՆԱՏՕ-ի շաբաթվա կազմակերպման եւ անցկացման, ինչպես նաեւ կանանց անվտանգության հարցերով կոնֆերանսի կազմակերպման համար: «Հասարակությունը ավելի անվտանգ է, եթե կինը նրա լիիրավ անդամն է»,- մանրամասնել է ՆԱՏՕ-ի գլխավոր քարտուղարի տեղակալը:
«Մենք կարող ենք աշխատել մի շարք ուղղություններով՝ մեր շահերից ելնելով: Ես անհամբերությամբ սպասում եմ մեր համագործակցության շարունակությանը»,- ամփոփել է Ռոուզ Գյոթեմյուլլերը: