Այս տարիներին Թուրքիան ցույց տվեց, որ պատրաստ չէ իր հարեւանների եւ առաջին հերթին Հայաստանի հետ հարաբերությունների կարգավորման ճանապարհով գնալ: Այս մասին NEWS.am-ի հետ զրույցում ասաց ԱԺ փոխնախագահ, ՀՀԿ մամուլի քարտուղար Էդուարդ Շարմազանովը՝ պատասխանելով մեր այն հարցին, թե կարո՞ղ են ինչ-ինչ դրական նախադրյալներ առաջանալ հայ-թուրքական հարաբերությունների կարգավորման ուղղությամբ առաջընթացի համար, եթե հաշվի առնենք այն փաստը, որ Թուրքիան վերջնականապես հեռանում է ժողովրդավարական սկզբունքներից եւ էլ ավելի ավտորիտար երկիր է դառնում:
Նրա խոսքով՝ հայկական կողմը քանիցս հայտարարել է, որ այս գործընթացը կարող է ընթանալ միայն միմյանց հանդեպ կողմերի որեւէ նախապայմանի բացակայության պարագայում: «Հայաստանը դեմ է վերջնագրերի ճանապարհով հարաբերությունների կարգավորմանը: Թուրքիան սահմանակցում է մեզ: Եվ Թուրքիան է շրջափակում Հայաստանի հետ սահմանները»,- արձանագրեց Շարմազանովը՝ հավելելով, որ նման պահվածքը 21-րդ դարում անթույլատրելի է:
Հիշեցնենք, որ Հայաստանի եւ Թուրքիայի միջեւ դիվանագիտական հարաբերություններ չկան, իսկ հայ-թուրքական սահմանը թուրքական կողմի նախաձեռնությամբ փակ է 1993 թվականից: 2 երկրների միջեւ հարաբերությունների կարգավորման գործընթացը 2008 թվականի աշնանից նախաձեռնել է Հայաստանի նախագահ Սերժ Սարգսյանը: 2009-ի հոկտեմբերի 10-ին 2 երկրների ԱԳ նախարարները Ցյուրիխում ստորագրել են «Դիվանագիտական հարաբերությունների հաստատման մասին» եւ «Երկկողմ հարաբերությունների զարգացման մասին» արձանագրություններ: Սակայն հետագայում Անկարան սկսեց նախապայմաններ առաջադրել ղարաբաղյան հակամարտության մասով, ինչը բերեց հայ-թուրքական հարաբերությունների կարգավորման գործընթացի փաստացի խզման: Արձանագրությունների վավերացման հարցը սառեցված է:
