Մի քանի տարի առաջ այդ փորձը ձեռնարկվեց, բայց թուրքական կողմի նախաձեռնությամբ ամեն ինչ դադարեցվեց: Այս մասին NEWS.am- ի թղթակցի հետ զրույցում հայտարարել է «Ելք» դաշինքի խորհրդարանական խմբակցության քարտուղար Գեւորգ Գորգիսյանը` պատասխանելով այն հարցին, թե արդյոք կարող են հայ-թուրքական հարաբերությունների բարելավմանն ուղղությամբ դրական նախադրյալներ առաջանալ, հաշվի առնելով այն, որ Թուրքիան վերջնականապես հեռանում է ժողովրդավարական սկզբունքներից եւ դառնում է ավելի ավտորիտար երկիր:
Նրա խոսքով՝ հայ-թուրքական հարաբերությունների բարելավման գործընթացի գոնե սկզբի համար ներկայումս ոչ մի նախադրյալ չկա: «Ամեն դեպքում, մենք կողմ ենք Թուրքիայի հետ բաց սահմաններ ունենալուն: Որովհետեւ ցանկացած դեպքում, երկրի շրջափակումը ծայրահեղ քայլ է: Սակայն մենք ունենք այն, ինչ ունենք», - ասել է Գորգիսյանը` հավելելով, որ Անկարան այս հարցում ունի կոնկրետ դիրքորոշում եւ այն բերում է նրան, որ Հայաստանի հետ սահմանը պետք է փակ լինի, իսկ Երեւանի հետ հարաբերությունները ոչ մի կերպ չկարգավորեն:
Հիշեցնենք, որ Հայաստանի եւ Թուրքիայի միջեւ դիվանագիտական հարաբերություններ չկան, իսկ թուրքական կողմի նախաձեռնությամբ 1993 թվականից փակվել է հայ-թուրքական սահմանը:
Երկու երկրների միջեւ հարաբերությունների կարգավորման գործընթացը 2008 թվականի աշնանը նախաձեռնել էր Հայաստանի նախագահ Սերժ Սարգսյանը:
2009-ի հոկտեմբերի 10-ին Ցյուրիխում երկու երկրների արտգործնախարարները ստորագրեցին «Դիվանագիտական հարաբերությունների հաստատման մասին արձանագրությունը» եւ «Երկկողմ հարաբերությունների զարգացման մասին արձանագրությունը»:
Սակայն հետագայում Անկարան սկսեց նախապայմաններ առաջադրել ղարաբաղյան հակամարտության համար, ինչը հանգեցրեց հայ-թուրքական հարաբերությունների կարգավորման գործընթացի փաստացի խափանմանը: Արձանագրությունների վավերացման հարցը սառեցված է:
