Այս պահին «Ծառուկյան» դաշինքի օրակարգում «Ելք»-ի հետ բանակցելու հարց դրված չէ: Այս մասին NEWS.am-ի հետ զրույցում ասաց «Ծառուկյան» դաշինքի պատգամավոր Նաիրա Զոհրաբյանը` անդրադառնալով «Ելք»-ի այն հայտարարությանը, որ իրենք մտադիր են բանակցություններ սկսել «Ծառուկյան» դաշինքի հետ ՀՀ նախագահի թեկնածու առաջադրելու հարցում:
«Այս պահին «Ծառուկյան» դաշինքի օրակարգում նման հարց գոյություն չունի: Եւ ընդհանրապես մենք, իհարկե, հարգանքով ենք վերաբերում ցանկացած դաշինքի եւ կուսակցության քաղաքական օրակարգին այդ թվում «Ելք»-ի քաղաքական օրակարգին, բայց այս պահին մեր օրակարգում նախագահի թեկնածուների շուրջ բանակցություններ սկսելու հարց մենք չունենք: Ըստ իս, բանակցությունների առաջարկ, երբ որ արվում է, բանակցությունը ինքը ենթադրում է, որ 2 կողմերն արդեն իրենք պետք է ընտրեն կողմերի համար ընդունելի թեկնածուն: Երբ որ նման հարց կքննարկենք, մենք այդ մասին կհայտարարենք»,-ասաց Նաիրա Զոհրաբյանը:
Նա նշեց, որ «Ելք»-ի այս նախաձեռնությունը նորմալ են գնահատում, քանի որ նրանց իրավունքն է՝ ձեւավորել իրենց օրակարգը:
Նաիրա Զոհրաբյանը նշեց, որ իրենց օրակարգում նաեւ նախագահի թեկնածու առաջադրելու հարց չկա:
Ավելի վաղ տեղեկացրել էինք, որ «Ելք» դաշինքը ՀՀ նախագահի թեկնածու է առաջադրել նույնանուն խմբակցության պատգամավոր Արտակ Զեյնալյանին:
Նշենք որ 2018 թվականին ավարտվում է ՀՀ նախագահ Սերժ Սարգսյանի լիազորությունների ժամկետը, որից հետո Հայաստանն ամբողջությամբ անցնում է խորհրդարանական կառավարման համակարգի, որտեղ իշխանության թիվ մեկ պաշտոնյան լինելու է երկրի վարչապետը: Նոր նախագահն ընտրվելու է Ազգային ժողովի կողմից եւ ունենալու է սահմանափակ լիազորություններ:
