«Մեղրու» ազատ տնտեսական գոտին Հայաստանին հնարավորություն կտա ստանալ ազգային մրցակցային առավելություններ: Նման կարծիք դեկտեմբերի 18-ին՝ լրագրողների հետ հանդիպման ժամանակ հայտնեց տնտեսագիտական գիտությունների դոկտոր, «Այլընտրանք» հետազոտական կենտրոնի ղեկավար Թաթուլ Մանասերյանը:
Նրա խոսքով՝ «Մեղրու» ազատ տնտեսական գոտին տարբերվում է երկրում գործող նման գոտիներից նրանով, որ գտնվում է սահմանին եւ կարող է խթանել ոչ միայն Հայաստանի եւ Իրանի միջեւ տնտեսական հարաբերությունները, այլ նաեւ ԵՏՄ-ի 100 միլիոնանոց եւ Իրանի 80 միլիոնանոց շուկայի միջեւ գործակցությանը: «Մենք կարող ենք օգուտ քաղել դրանից, եթե ճիշտ օգտագործենք ինտեգրացիոն գործընթացներից»,-նշեց տնտեսագետը:
Հիշեցնենք, որ «Մեղրի» ազատ տնտեսական գոտին բացվել է դեկտեմբերի 15-ին: Առաջիկա տարիներին նախատեսվում է ներգրավել 50-70 ընկերություններ, որոնց կողմից կատարված ներդրումները կհասնեն 130-150 մլն դոլարի, ինչպես նաեւ կստեղծվեն շուրջ 1500 նոր աշխատատեղեր: Արտահանման ծավալը կկազմի 350 միլիոն: Ազատ տնտեսական գոտու գործողության ժամկետը 50 տարի է:
