Միացյալ Նահանգները վետո է դրել ՄԱԿ Անվտանգության խորհրդի բանաձեւի նախագծին, որը դատապարտում էր Երուսաղեմի ճանաչումը որպես Իսրայելի մայրաքաղաք: 14 երկրներ կողմ են քվեարկել բանաձեւին, սակայն Վաշինգթոնի վետոն նշանակում է, որ բանաձեւը չի կարող ընդունվել:
ՄԱԿ-ում ԱՄՆ մշտական ներկայացուցիչ Նիկի Հեյլին բանաձեւը անվանել է «վիրավորանք», որը չի մոռացվի` ասելով, որ Միավորված ազգերի կազմակերպությունը ստիպել է ԱՄՆ-ին օգտագործել վետոյի իրավունքը միայն այն պատճառով, որ երկիրն իրավունք ունի որոշել, որտեղ տեղակայել իր դեսպանությունը, հաղորդում է AP-ն:
«Ամերիկայի ձայնը» նշում է, որ բանաձեւում «մեծ ափսոսանք» էր արտահայտվում ԱՄՆ նախագահ Դոնալդ Թրամփի` Երուսաղեմը որպես Իսրայելի մայրաքաղաք ճանաչելու եւ Թել Ավիվից իր դեսպանատունը տեղափոխելու որոշման կապակցությամբ: