Սանկտ Պետերբուրգի ահաբեկչության ժամանակ, որն օգնեցին կանխել ԱՄՆ հատուկ ծառայությունները, զոհ կարող էին դառնալ հազարավոր մարդիկ, հայտարարել է ԱՄՆ նախագահ Դոնալդ Թրամփը` ներկայացնելով ԱՄՆ ազգային անվտանգության նոր ռազմավարությունը, հաղորդում է ՌԲԿ-ն:
Նրա խոսքով՝ նրա վարչակազմի կողմից մշակված ռազմավարությունը հիմնված է իրատեսության վրա, ԱՄՆ-ն համագործակցելու է Ռուսաստանի եւ Չինաստանի հետ այնպես, որ միշտ պաշտպանի ազգային անվտանգությունը: Նա օրրնակ է բերել Սանկտ-Պետերբուրգում ԿՀՎ օգնությամբ կանխված ահաբեկչական հարձակումը:
Կիրակի՝ դեկտեմբերի 17-ին, Կրեմլի մամուլի ծառայությունը հաղորդել էր, որ նախագահ Վլադիմիր Պուտինը հեռախոսազրույցում շնորհակալություն է հայտնել Թրամփին ԿՀՎ-ից տեղեկատվություն ստանալու համար, որը թույլ է տվել ահաբեկիչներին ձերբակալել: Ահաբեկիչները Սանկտ Պետերբուրգում եւ երկրի այլ քաղաքներում հարձակումներ էին նախապատրաստում:
Սպիտակ տան մամուլի ծառայությունն, իր հերթին, նշել է, որ ԱՄՆ հատուկ ծառայությունները ուրախ էին օգնել Ռուսաստանին Սանկտ Պետերբուրգում ահաբեկչական հարձակումները կանխելու եւ այդպիսով մարդկանց կյանքը փրկելու համար:
